Триесет и четири години по обновувањето на верската слобода, годинава повторно радосно одекнаа божикните ѕвона на православните цркви во Албанија, повикувајќи ги верниците да го прослават големиот празник.
Архиепископот на Албанија, Архиепископ Јован, началствуваше на Божествената Литургија во Соборниот храм „Воскресение Христово“ во Тирана, сослужуван од свештенството на Архиепископијата.
Како и во сите храмови, беше прочитана Божикната порака на Архиепископот Јован, во која се истакнува дека „должност на секој христијанин е да ја шири и да ја споделува оваа светлина со целиот свет, зашто само преку споделување со другите светлината може да се сочува и да се умножи; во спротивно, таа ќе ослабне и на крај ќе исчезне“.
Во пораката понатаму се нагласува: „Сега, повеќе од кога било, на светот му е потребна светлината Христова. Таа е неопходна, зашто живот без присуството на Господа станува беден – живот без љубов, без радост, без светлина, живот во темнина. Само Неговото присуство може да ги осветли нашите срца и души и да внесе светлина и радост во нашиот живот. Тој е светлината во нашата темнина, а Неговото учење, како што вели Псалмистот, е светилник за нашиот пат во овој живот“.
Пораката завршува со повик „за духовно да го прославиме Раѓањето Христово, во овие празнични денови да се потрудиме подлабоко да ја доживееме светоста и величието на овој божествен дар. Тоа можеме да го постигнеме со очистување на нашите срца од секоја злоба и со нивно исполнување со љубов и смирение кон сите луѓе, особено кон оние што се во потреба – сиромаштија, болест, очај и осаменост“.
По Божествената Литургија, Архиепископот разменил божикни честитки во салата на Светиот Синод со политички личности (меѓу кои и поранешниот претседател и премиер на Албанија Сали Бериша), претставници на верските заедници, дејци од културата и уметноста, како и со бројни граѓани.
И во другите митрополии на Албанија Божиќ беше свечено прославен, со исполнети храмови и верници кои со благоговејност учествуваа на богослужбите.
Митрополитот Николај од Фиер служеше Божествена Литургија во Соборниот храм „Свети Георгиј“ во Фиер и прими честитки од локални политички и верски претставници, како и од верници и млади.
Митрополитот Антониј од Елбасан богослужеше во храмот „Свети Николај“ и прими претставници на локалната власт и верските заедници, како и граѓани.
Митрополитот Астиј од Берат, кој служеше во Митрополитската црква „Свети Димитриј“ во Берат, исто така прими честитки од локалните политички и верски водачи.
Митрополитот Натанаил од Ѓирокастро служеше Божествена Литургија во Соборниот храм „Воскресение Христово“ во Ѓирокастро и подоцна прими честитки од локалните власти.
Митрополитот Анастасиј од Корча служеше во Митрополитската црква во градот, по што прими честитки од претставници на верските заедници, како и од официјални лица и граѓани од сите возрасти.
Извор: orthodoxtimes.com
