Дополнително е загрижувачко што во воведот на секоја емитувана емисија се зборува општо за „српскиот карактер“ на целата територија на денешна Северна Македонија, со што се промовира историски ревизионизам и негирање на македонскиот идентитет.
На националната српска телевизија РТС, секоја среда во 20:30 часот, а потоа и на РТС СВЕТ од 21:30 часот — канал кој преку сите оператори е достапен и во Македонија — се емитува серијалот „ВРЕМЕНСКА КАПСУЛА – Српске средњовековне задужбине у Северној Македонији“.
Серијалот претставува документарна продукција на Радио-телевизија на Србија, во која се прикажуваат најзначајните средновековни православни манастири на територијата на Република Македонија, но под континуиран наратив дека тие се „српски задужбини“.
Во рамки на серијалот досега се емитувани следните епизоди:
1. „Лесновски манастир“ – РТС: Временска капсула – Лесново
2. „Старо Нагоричане“ – РТС: Временска капсула – Старо Нагоричино
3. „Манастир Матејче“ – РТС: Временска капсула – Матејче
4. „Марков Манастир“ – РТС: Временска капсула – Марков манастир
Најавата за серијалот беше објавена на 18 септември 2025 година, кога РТС официјално најави дека од 1 октомври ќе започне со емитување на „документарни емисии за српските средновековни задужбини у Северној Македонији“.
Во секоја епизода се тврди дека средновековните македонски храмови, како Лесново, Старо Нагоричане, Матејче и Марков Манастир, се „дело на српски цареви“ и дека тие наводно им се „отстапени на користење“ на Северна Македонија.
Таквата реторика, отворено присутна во секоја епизода, претставува континуитет на старите шовинистички и асимилаторски политики, идентични со оние што Србија ги спроведуваше меѓу двете светски војни, кога се настојуваше македонското културно наследство да се претстави како српско.
Овој серијал, емитуван на државна телевизија финансирана од буџетот на Република Србија а снимен на територијата на Република Македонија, функционира како медиумска алатка за негирање на македонскиот културен и духовен идентитет и како средство за наметнување на идејата за „српски свет“ на просторот на Македонија.
Посебно загрижува фактот што РТС СВЕТ се емитува директно во Македонија, што значи дека ваквата пропаганда влегува во домовите на македонските граѓани без никаква институционална реакција.
Извор: srbi.org.mk
