Во историската катедрала „Светицховели“ во градот Мцхета, Грузија, на 14 октомври 2026 година беше одржана свечена Божествена литургија по повод 1.700-годишнината од прогласувањето на христијанството за државна религија во земјата.
Со богослужбата началствуваше грузискиот католикос-патријарх Шио III, во сослужение со архиепископот Прешовски и митрополит на Чешките земји и Словачка, Растислав, како и со архијереи на Православната црква на Гризија.
На свеченостите присуствуваа високи претставници и делегации од бројни помесни православни цркви, меѓу кои Вселенската, Александриската, Антиохиската, Ерусалимската, Руската, Српската, Романската и Бугарската патријаршија, како и православните цркви на Кипар, Грција, Албанија, Полска, Чешките земји и Словачка и Украина.
За време на свеченоста беше прочитана и пораката на Вселенскиот патријарх Вартоломеј, кој ја истакна важноста на единството меѓу помесните православни цркви и нивното заедничко сведочење на православната вера.
Во своето обраќање, грузискиот патријарх Шио III се осврна на историското значење на христијанството за грузискиот народ, нагласувајќи ја улогата на православната вера во зачувувањето на неговиот национален идентитет, јазик и духовна традиција.
Прославата беше посветена и на споменот на Света Нина, рамноапостолната просветителка на Грузија, чија мисионерска дејност одиграла пресудна улога во христијанизацијата на земјата во IV век.
Свеченостите опфатија и средби меѓу црковните делегации и грузиското државно раководство, како и меѓународен симпозиум посветен на историското и духовното наследство на земјата.
Меѓу објавените списоци на учесници и црковни делегации не се споменува претставник на Македонската православна црква – Охридска архиепископија. Засега нема јавно достапна информација дали МПЦ – ОА добила покана за учество на овој значаен меѓуправославен настан.
Оттука, останува отворено прашањето дали и зошто МПЦ – ОА не учествува на ваквите собири, кои претставуваат важна можност за зацврстување на братските односи и единството меѓу помесните православни цркви.
Извори: Romfea
