На врвот Голем Крчин на планината Дешат, на 2341 метри надморска височина, и оваа година беше отслужена Света Божествена Литургија, продолжувајќи ја традицијата која веќе единаесет години ги собира верниците и љубителите на планината.
Со благослов на епископот Антаниски г. Партениј, Евхаристијата под отворено небо ја отслужи архимандрит Кирил.
Голем број верници и планинари се искачија до врвот Голем Крчин, каде што меѓу планинските височини заедничареа во Светата Литургија.
Овој необичен богослужбен настан уште еднаш покажа дека литургискиот живот на Црквата не е ограничен само на храмовите, туку дека секое место на кое верните се собираат околу Светата Евхаристија може да стане место на молитва и заедница со Бога.
Посебна благодарност беше упатена до планинските водичи од Федерацијата на планинарски спортови на Македонија и Македонската асоцијација за интернационални водичи во планина, како и до службите на Националниот парк „Маврово“, кои се погрижија за безбедноста и организацијата на искачувањето.
Литургијата на Голем Крчин се одржува веќе единаесетта година, создавајќи единствена традиција во која планинарењето, молитвата и Евхаристијата се спојуваат на една од највисоките точки на планината Дешат.
Извор: https://bigorski.org.mk/
