Во јавноста денес се појавија преписки од заштитената Скај комуникација кои укажуваат дека скриени камери го снимале изборниот Собор на Православната црква на Србија, одржан на 18 февруари 2021 година, кога за патријарх беше избран Патријарх Порфириј.
Наводните преписки и документк ги објави Центар за истражувачко новинарство, кој тврди дека камерите биле нарачани од поранешен функционер на државните безбедносни служби, поврзан со личности од балканското подземје.
Според извештајот, снимањето на Соборот било строго забрането, а учесниците претходно добиле писмена гаранција од Светиот архијерејски синод дека гласањето ќе се одвива во услови на приватност и духовен мир.
Во фокусот на истрагата се наоѓа Љубан Еќим, за кого се наведува дека управувал со операцијата за поставување скриени камери. Во преписките преку Скај апликацијата се разговарало за начини како камерите да се сокријат во звучници и други елементи во криптата на Храм Свети Сава, каде се одржал Соборот.
Разгледувани биле различни решенија – поставување камери во микрофони, ламби или звучници. Во една од пораките се споменува камера која „може да гледа низ мрежа, без да се забележи ништо“.
Според објавените информации, снимката од Соборот наводно била предадена на Еќим околу еден час по изборот на новиот патријарх. Истовремено, се разговарало и за договори за системи за видеонадзор, озвучување и техничка опрема во храмот.
Истражувањето наведува дека компанијата „Sion Company“ добила повеќе договори поврзани со системите за надзор и конференциска опрема, а дел од документите биле потпишани од тогашниот митрополит, а подоцна патријарх, Порфириј. Се споменуваат договори вредни стотици илјади евра, како и долгорочен договор за одржување на системите.
Од компанијата ги отфрлиле обвинувањата за поврзаност со тајни камери. Нејзиниот сопственик изјавил дека не знае кој е Љубан Еќим и дека неговата фирма ги исклучува постоечките камери пред секој Собор, по налог на Црквата.
Новинарите наведуваат дека побарале одговори од повеќе лица, меѓу кои и од патријархот Порфириј, претставници на СПЦ и други црковни великодостојници, но официјални одговори не добиле.
Текстот се темели на истражување и наводи објавени од CIN. Дел од обвинувањата не се судски потврдени, а засегнатите страни ги негираат или не одговориле на обвинувањата.
Извор: nedeljnik.rs
