Во историско обраќање пред грчкиот Парламент, Вселенскиот патријарх Вартоломеј упати порака за мир, човечко достоинство, православна одговорност и духовна будност во време на војни и глобални кризи
Вселенскиот патријарх г. г. Вартоломеј, кој од 4 мај престојува во повеќедневна посета на Атина, упати силна порака за мир, единство и одговорност на Црквата пред современиот свет, говорејќи пред грчкиот Парламент на посебна свечена седница.
Ова беше негово прво обраќање во Пленарната сала на Вουλή των Ελλήνων по 27 години, односно по неговиот историски говор во 1999 година. Седницата се одржа во присуство на претседателот на Грција, Константинос Тасулас, а по поздравното слово на претседателот на Парламентот, Никитас Какламанис, на Вселенскиот патријарх му беше доделен Златниот медал на грчкиот Парламент.
Во своето обраќање, +Патријархот Вартоломеј ја истакна духовната и историската мисија на Вселенската Патријаршија како чувар на православното предание, но и како глас што не може да молчи пред страдањето на човекот, нарушувањето на мирот и уништувањето на Божјото создание.
„Мирот никогаш не бил саморазбирлива состојба“, порача Патријархот, нагласувајќи дека тој секогаш бил плод на храброст, жртва, правда и отфрлање на насилството како средство за решавање на човечките и меѓународните спорови.
Во време кога светот е потресен од војната во Украина, кризата на Блискиот Исток и бројни други конфликти, Вселенскиот патријарх предупреди дека религиите не смеат да станат извор на фанатизам, мразење и насилство, туку треба да бидат сили на помирување, дијалог и заштита на човечкото достоинство.
Тој особено подвлече дека вистинската вера во Бога на љубовта и мирот не го оддалечува човекот од историјата и од одговорноста за светот, туку напротив, го зајакнува неговото чувство за правда, за должност и за заштита на ближниот. Според Патријархот, Црквата не може да остане затворена во себе кога се загрозени човекот, слободата, мирот и создадениот свет.
Во говорот беше нагласено и значењето на Светиот и Велик Собор на Православната Црква, одржан на Крит во 2016 година, чија десетгодишнина се одбележува оваа година. Патријархот потсети дека Соборот јасно ја потврди одговорноста на Црквата да зборува „во полза на човекот“ и да сведочи за достоинството на човечката личност во современиот свет.
Во тој дух, тој ја поврза православната вера со грижата за човекот, општеството и природната средина, истакнувајќи дека заштитата на созданието не е споредна тема, туку дел од самото духовно сведоштво на Црквата. Патријархот повтори дека економијата, развојот и општествениот напредок немаат иднина ако не се темелат врз почитување на човекот, мирот и природниот дом на животот.
Посетата на Вселенскиот патријарх во Атина започна на 4 мај, кога тој се сретна со Архиепископот Атински и на цела Грција г. Јероним, а потоа беше одликуван од Градот Атина со почесно признание за неговата долгогодишна заложба за заштита на природната и културната средина.
Оваа посета има и посебна симболика, бидејќи се случува во година кога Патријархот Вартоломеј одбележува 35 години патријаршиска служба и 65 години свештеничко служење. Во текот на неговата повеќедневна програма во Атина се предвидени и други средби и свечености посветени на улогата на Вселенската Патријаршија во современиот свет.
Со своето обраќање пред грчкиот Парламент, Вселенскиот патријарх испрати порака дека Православната Црква не смее да биде нем сведок пред трагедиите на современата историја. Нејзиното сведоштво, како што нагласи, треба да остане сведоштво за мир, човечко достоинство, духовна слобода и одговорност пред Бога, човекот и созданието.
