Со овие зборови на преподобниот Пајсиј Светогорец, изречени по изборот на г. г. Вартоломеј за Вселенски Патријарх во 1991 година, му се обрати Софискиот Патријарх г. г. Даниил, кој отпатува да ја одбележи оваа годишнина, како и годишнината од неговото ѓаконско ракополагање, на родниот остров на поглаварот на Вселенската Патријаршија.
Меѓу кажаното од бугарскиот првојерарх особено се издвојуваат следните делови:
„Ваше Сесветејшество, со Вашата својствена братска срдечност благоволивте да го поканите нашето смирение оваа година да присуствува на островот Имврос по повод оваа двојна радосна свеченост: споменот на светиот славен апостол Вартоломеј, во чиј ден го празнувате Вашиот именден, како и јубилејот на Вашето триесет и петгодишно патријаршиско служење на Константинополскиот престол… Јас побрзав да одговорам дека за мене учеството на денешната свеченост ќе биде особена радост.
И еве, денес… се наоѓаме тука – во Вашето родно место, на прекрасниот остров Имврос… во Вашето родно село Свети Теодори, за да го почитуваме споменот на светите апостоли Вартоломеј и Варнава, но и да го покажеме нашето почитување лично кон Вас, Ваше Сесветејшество.
И ние, отфрлајќи ги суетата и безбожноста на сегашниот свет, со една уста и едно срце вознесуваме молитви кон Себлагиот Бог за здравјето, долговечноста и боговдахновеното утврдување на Вашето Сесветејшество.
Тука, веруваме, за првпат биле посеани и воспитани оние добродетели што и денес ја красат Вашата личност: едноставноста, гостопримството, непосредната љубов кон ближниот и длабоката преданост кон вековното Предание на Црквата.
Така овој мал остров во Егејското Море… се удостои да ѝ го подари на славната Константинополска Црква нејзиниот патријарх, прв по чест меѓу богољубивите предстојатели на Помесните сестрински Православни Цркви.
Во текот на триесет и пет години ѝ служите на Црквата со преданост, постојаност и неуморна грижа.
Добро познати се зборовите на преподобниот Пајсиј Светогорец, кој, кога дознал за Вашиот избор, рекол: „Бог го избра вистинскиот човек, за вистинското место, во вистинското време!“.
Ние сме уверени дека овој собор на современи светители… непрестајно се моли пред Господа за Вашето Сесветејшество, го укрепува и поддржува Вашето многутрудно и одговорно служење…
Нашето присуство овде не е само израз на почит кон Вашата личност. Тоа е пред сѐ сведоштво за единството на Православието, за братското општење меѓу светите Божји Цркви и за нашиот заеднички пат преку „врските на мирот“ (Ефесјаните 4:3).
Го молиме Себлагиот Бог, по молитвите на Неговата Пресвета Мајка, на Вашиот небесен покровител – светиот апостол Вартоломеј, на светиот апостол Варнава, на свети Лука, архиепископ Симферополски, и на сите светии, да Ви подари крепко душевно и телесно здравје, непрестајна радост и духовно ликување во Господа, мир ослободен од секоја вознемиреност, духовно просветлување и сила одозгора, за уште многу години да го продолжувате Вашето благословено служење за доброто на Константинополската Црква и за единството на светото Православие.
На многаја, мирна и плодна лета, Ваше Сесветејшество!“
Во словото на Патријархот Даниил кон Вселенскиот Патријарх Вартоломеј не се забележува никаква критика, забелешка или прикриен приговор. Напротив, обраќањето беше исполнето со почит, братска љубов и сведоштво за единството на Православната Црква. Во него немаше ниту повик за преиспитување на Томосот за автокефалност на Православната Црква на Украина, ниту критика кон екуменската дејност на Вселенската Патријаршија, ниту пак осврт кон обвинувањата за таканаречен „источен папизам“.
Извор:
Христијанство.бг
Целиот текст на словото може да се прочита од изворот тука
