Геополитиката не треба да се меша во црковните прашања, истакна патријархот бугарски г. Даниил во изјава за новинарите, на денот кога се одбележуваа две години од неговиот избор и востоличување.
Во вторникот, на 30 јуни 2026 година, по повод годишнината, во катедралниот храм „Св. Александар Невски“ во Софија беше отслужена патријаршиска и полиархиерејска Божествена литургија, со која началствуваше патријархот Даниил.
Пред почетокот на Литургијата, обраќајќи им се на претставниците на медиумите, патријархот изјави дека оценката за неговата досегашна служба ќе ја дадат самите православни христијани.
„Она што нè радува е тоа што Православната црква на Бугарија ужива доверба кај институциите. За тоа Му благодариме на Бога, како и на сите што го поддржуваат нашето дело“, истакна тој.
Патријархот Даниил нагласи и дека во последните години се создала поволна клима за духовната мисија на Црквата, како и за унапредување на важни законски решенија. Според него, и во претходниот и во сегашниот состав на Народното собрание, поврзаните измени биле усвоени со широка согласност меѓу политичките сили, што тој го оцени како особено позитивно.
Запрашан за пакетот санкции на Европската Унија против Русија, во кој е вклучен и патријархот московски г. Кирил, патријархот бугарски Даниил подвлече дека геополитиката не треба да се меша во црковните прашања.
Тој потсети и на неодамнешна средба на папата Лав со кардинали од целиот свет, на која, како што рече, било изразено мислење дека санкциите на Европската Унија се применуваат селективно. Според него, во други делови од светот, каде што исто така има воени конфликти и уште потрагични последици за цели народи, не се преземаат слични мерки.
Патријархот Даниил оцени дека тоа отвора прашања дали санкциите главно служат на политички и економски интереси, а не на начелата на меѓународното право.
Извор: orthodoxianewagency.gr
