Светиот синод на Православната црква на Бугарија – Бугарска патријаршија упати покана до Вселенскиот патријарх Вартоломеј да ја посети Бугарија и да учествува во свеченостите по повод 1150 години од раѓањето и 1080 години од упокојувањето на преподобниот Јован Рилски Чудотворец, небесен покровител и заштитник на бугарскиот народ.
Одлуката била донесена на редовната седница на Светиот синод, одржана на 26 јуни 2026 година, во полн состав. Свеченостите ќе се одржат во периодот од 16 до 20 октомври годинава.
Посебна црковна делегација, предводена од Русенскиот митрополит Наум, во чиј состав биле и Мелнишкиот епископ Герасим, главен секретар на Светиот синод, како и д-р Александар Смочевски, го посети Истанбул, каде што се сретна со Вселенскиот патријарх Вартоломеј и му ја предаде поканата, како и поздрави од бугарскиот патријарх Даниил и Светиот синод на БПЦ-БП.
Средбата се одржала во храмот „Света Недела“ во Кондоскали, каде што била отслужена свечена света Литургија по повод празникот на света Недела.
На крајот од Литургијата, Вселенскиот патријарх Вартоломеј им се обратил на бугарските претставници, истакнувајќи дека со искрена љубов и длабока почит ја поздравува официјалната делегација на Црквата на Бугарија, која пристигнала како носител на официјална почесна покана од Светиот синод.
„Во ваше лице ја поздравуваме целата Светејша Бугарска црква и братски го целиваме нејзиниот предстојател, многуљубениот и Блаженејши Софиски митрополит и Бугарски патријарх Даниил, чија неодамнешна посета на нашиот роден Имврос по повод нашиот именден нè исполни со духовна радост, трогнатост и ликување“, рекол патријархот Вартоломеј.
Тој нагласил дека двете цркви се поврзани со „свети и нераскинливи врски“ – врски на заедничката вера и љубов, која, според зборовите на апостол Павле, „никогаш не престанува“.
Во писмото испратено од бугарскиот патријарх Даниил и Светиот синод на БПЦ-БП се наведува дека духовното наследство и животот на свети Јован Рилски се дел од заедничкиот византиско-словенски црковен и културен простор, во кој низ вековите се развивале историските односи меѓу Бугарската православна црква – Бугарска патријаршија и Константинополската Вселенска патријаршија.
„Поради тоа, личноста на свети Јован Рилски претставува една од живите духовни врски меѓу двете сестрински цркви, сведочејќи за нивната многувековна заедничка историја и припадност кон заедничкото Православно предание“, се вели во писмото.
Целосната програма и дополнителните детали за свеченостите ќе бидат соопштени навремено.
Извор: https://bg-patriarshia.bg/news/sv-sinod-na-bpts-bp-otpravi-pokana-kam-vselenskia-patriarh-v
