Група истакнати православни теолози од САД повикаа на обновени напори за воспоставување заеднички датум за празнување на Велигден со Римокатоличката и протестантските цркви, со цел зајакнување на христијанското единство.
Иницијативата произлегува од колоквиумот одржан на 24 јануари 2025 година во Богословското училиште „Свет Крст“ во Бруклин, Масачусетс, по повод 1700-годишнината од Првиот вселенски собор во Никеја (325 г.), кој го утврдил начинот на пресметување на Велигден.
Според никејската формула, Велигден треба да се празнува во првата недела по првата полна месечина по пролетната рамноденица. Иако ова правило го прифаќаат и Истокот и Западот, разликите настануваат поради користењето на различни календари – Јулијанскиот кај православните и Грегоријанскиот кај католиците и протестантите.
Ова доведува до тоа Велигден често да се слави на различни датуми, што, според теолозите, има сериозни пасторални последици, особено во средини каде што живеат мешани христијански семејства. Во такви случаи, верниците често се принудени празникот да го одбележуваат одвоено.
Тие нагласуваат дека прашањето не е догматско, туку практично – односно се однесува на начинот на примената на никејското правило, а не на самата вера во Воскресението Христово.
Како главни пречки за усогласување се наведуваат:
-внатрешните поделби меѓу православните цркви,
-недоволната едукација за начинот на пресметка,
-институционалната воздржаност кон промени.
-Сепак, се предлага постепен пристап преку едукација, локални иницијативи и отворен дијалог.
Теолозите потсетуваат дека одредени православни цркви веќе користат Грегоријански календар за неподвижните празници, а постојат и примери како Православната црква на Финска, која Велигден го празнува според Грегоријанскиот календар, без нарушување на црковното единство.
На крајот, тие истакнуваат дека заедничкото празнување на Велигден би било силен симбол на христијанско единство во современиот свет и би претставувало практично сведоштво за заедничката вера.
Извор: greekreporter.com
