Американскиот астронаут Виктор Гловер, член на мисијата Artemis II на NASA, испрати силна духовна порака додека се наоѓа илјадници километри од Земјата, гледајќи ја нашата планета од перспективата на длабоката вселена.
Во пресрет на Велигден, Гловер зборуваше за значењето на верата и убавината на создадението, нагласувајќи дека токму од далечина најсилно се чувствува уникатноста на Земјата.
„Драго ми е што го спомнавте тоа. Мислам дека овие празници се важни. Кога сме толку далеку од Земјата и ја гледаме убавината на созданието… кога ја читам Библијата и размислувам за сè што е направено за нас, тоа е навистина нешто длабоко“, изјави Гловер.
Тој ја опиша Земјата не како случајност, туку како свесно создаден дар.
„Го имате ова неверојатно место, овој ‘вселенски брод’. Вие зборувате со нас затоа што ние сме во вселенско летало далеку од Земјата. Но и вие сте на еден ‘вселенски брод’ – Земјата, која е создадена за да ни овозможи живот во космосот“, рече тој.
Гловер отворено говореше и за празнината на универзумот, споредувајќи ја со уникатноста на нашата планета.
„Можеби мислите дека тоа што го правиме е нешто посебно затоа што сме далеку, но ние сме на исто растојание од вас. И верувајте ми – вие сте тие што сте посебни во оваа огромна празнина. Универзумот е исполнет со ништо, а вие ја имате оваа оаза – ова прекрасно место каде што заедно постоиме.“
Во својата порака, тој повика на единство меѓу луѓето, особено во духот на велигденските празници.
„Како што се приближува Велигден, без разлика на културата, дали некој верува или не, ова е можност да се потсетиме каде сме, кои сме и дека сме едно. Треба да поминеме низ сè заедно“, истакна Гловер.
Неговите зборови потсетуваат на историскиот момент од Apollo 8, кога астронаутите читаа делови од Книгата Битие додека орбитираа околу Месечината.
Во време на поделби и несигурност, пораката од вселената носи јасен повик: човештвото не е случајност, а Земјата не е обична планета – туку заеднички дом, дар што треба да се чува и почитува.
