Денес Црквата го слави најголемиот празник – Светата Пасха, Воскресението на Господ Исус Христос.
Жените што присуствувале на погребението на Христос во петокот – Марија Магдалена и другите – по враќањето од Голгота подготвиле мириси и миро за да го помажат Неговото тело. Следниот ден, поради саботниот одмор, не вршеле никаква работа.
Но, рано наутро во неделата, „првиот ден од седмицата“, по околу триесет и шест часа од Неговата смрт, доаѓаат на гробот носејќи мириси. Додека размислувале како ќе го оттурнат каменот од гробот, се случил силен земјотрес. Ангел со светол изглед го оттурнал каменот и седнал врз него, а стражарите се исплашиле и побегнале.
Кога жените влегле во гробот и не го нашле телото на Исус, им се јавиле двајца ангели во светли облеки, кои им ја објавиле радосната вест за Воскресението и ги испратиле да им јават на учениците.
Набргу потоа, апостолите Петар и Јован дошле до гробот и ја нашле само плаштаницата. Со радост се вратиле, станувајќи сведоци и проповедници на Воскресението Христово, Кого навистина Го виделе жив.
Празнувајќи ја оваа радосна вест, верниците се поздравуваат со воскресниот поздрав, покажувајќи дека непријателството меѓу човекот и Бога е надминато и дека преку Христовото страдање и Воскресение доаѓа помирување и спасение.
Празникот се нарекува Пасха – што значи „премин“, затоа што Христос нè приведе од смртта во живот, од ропството на гревот во слобода и вечна радост.
Неделата, денот на Воскресението, станала ден на одмор и празнување, заменувајќи ја старозаветната сабота, и била посветена на Господ уште од времето на апостолите.
Тропар (глас 5)
Христос воскресна од мртвите,
со смртта смртта ја победи
и на тие во гробовите
живот им подари.
