Ученик во седмо одделение од Битола објавил заканувачка содржина на социјалната мрежа Тик-Ток, во која наводно биле наведени имиња на негови соученици. Случајот предизвикал вознемиреност меѓу родителите и учениците, по што реагирале училиштето и надлежните институции.
Директорот на основното училиште „Стив Наумов“ од Битола, Николе Пискачев, изјави дека училиштето веднаш презело мерки во рамките на своите надлежности. Одржан бил родителски состанок, а за случајот биле известени Министерството за внатрешни работи, Центарот за социјални работи и подрачното одделение за образование на Општина Битола.
Според директорот, содржината не била објавена во училиштето, ниту за време на наставниот процес, туку надвор од училишните клупи. Сепак, по претставка од група родители до Државниот просветен инспекторат, училиштето без одлагање ги известило надлежните институции со цел случајот целосно да се испита.
„Во рамките на нашите надлежности, училиштето презеде соодветни мерки за заштита и поддршка на учениците, како и активности за смирување на состојбата и обезбедување безбедна и сигурна средина за сите ученици и вработени“, изјави директорот Пискачев.
Тој апелираше до јавноста за воздржаност од ширење непроверени информации и за почитување на приватноста и достоинството на сите инволвирани лица, особено затоа што станува збор за малолетници.
„Безбедноста и благосостојбата на учениците останува наш највисок приоритет и училиштето ќе продолжи да соработува со надлежните институции до целосно разрешување на случајот“, додаде директорот.
Според информациите објавени во медиумите, родителите на ученикот најавиле дека ќе го променат училиштето.
Случајот повторно ја отвора темата за безбедноста на децата на социјалните мрежи, навремената реакција на институциите и потребата од поголема вклученост на родителите, училиштата и стручните служби во следењето на дигиталното однесување на учениците.
Извор: https://4news.mk/uchenik-od-bitola-na-tik-tok-objavil-spisok-na-uchenitsi-za-likvidatsija/?fbclid=Iwb21leARpkt5leHRuA2FlbQIxMQBzcnRjBmFwcF9pZAwzNTA2ODU1MzE3MjgAAR49ovv0nI4ADrt8kgJAqxDLrP6Mq7IMgXMmO2pSuPX8ZXH1K7hRuHmbmvglfw_aem_A-nE0OZdjKUQti6ID_ji1Q
