„Привремената платформа поставена во внатрешноста на храмот е целосно соодветна за носење на тешката опрема,“ соопшти член на Научниот совет на Света Софија, по реакциите што ги предизвика сликата од кран-возило поставено во внатрешноста на храмот.
Фотографиите покажаа тешко возило паркирано врз привремени заштитни плочи на подот, како и друго возило поставено во близина на т.н. „Империјална порта“, главниот церемонијален влез во објектот.
Според hurriyetdailynews.com, професорот Ахмет Гулеч изјави дека помалите кранови достигнале висински лимит од 25 метри, што наложило употреба на поголема механизација. Платформата под нив е проектирана по обемни технички анализи и може да издржи околу 30 тони по квадратен метар — многу повеќе од максималните шест тони што ги носи кранoт.
Тој го објасни и слоевитото решение на платформата, направено за да го заштити историскиот мермерен под и истовремено да обезбеди стабилност за деловите од скелето кои се внесуваат однадвор. Крановите се неопходни за поставување привремен горен покрив што ќе го заштити куполниот покрив за време на чистењето и зајакнувањето на неговата оловна облога.
Гулеч истакна дека силните летни дождови претставуваат значителна опасност доколку куполата остане незаштитена, поради што привремениот покрив е неопходен. Крановите ќе останат во објектот само додека не се довршат платформата и дополнителните структури, што најверојатно ќе се случи до крајот на годината. Тој додаде дека надлежните требало многу појасно да ја објаснат целата реставраторска постапка на јавноста.
Извор: orthodoxtimes.com
