Свечено и за првпат беше прославена Неделата на Православието во Светата Епископија на Бенин, Того и Буркина Фасо при древното Патријаршиско седиште на Александрија и цела Африка.
Пред самата прослава, со благослов на Неговото Блаженство и со поддршка на Православното мисионерско здружение на Америка (OCMC), се одржа четвртиот свештенички семинар, на кој се собраа сите свештеници и вероучители од Светата Епископија во Порто-Ново. Семинарот заврши свечено во недела, на 1 март, кога Преосвештениот Атанасиј сослужуваше со сите свештеници и нивните парохијани. Со воодушевување и побожност, верниците ја следеа литијата со светите икони, трогнати што за првпат учествуваат во вакво чествување.
Во своето обраќање, Преосвештениот Епископ Атанасиј ja охрабри своjата паства да биде горда на својата православна вера, истакнувајќи дека пораката и духот на Православието немаат граници и ги прегрнуваат сите луѓе. Тој ги повика верниците во овој период на Великиот пост да го издигнат својот живот како образ Божји, стекнувајќи добродетели што водат кон очистување и обновување на богоподобието, за повторно да се стекнат со изгубениот рај.
Денот беше заокружен со пригодни манифестации во чест на триумфот на Православието, а за верниците беше приреден и заеднички оброк со грижата на Централниот добротворен фонд „Филоксенија“ при Светата Митрополија на Белгија, Холандија и Луксембург, кои заедно со својот архипастир г. Атинагора постојано се грижат за мисионерскиот развој на Светата Епископија.
Извор: orthodoxianewsagency.gr
