Њујорк, САД – Во срцето на Њујорк, на прочуениот Тајмс Сквер, за првпат беа синхронизирано активирани 27 дигитални билборди, кои наместо вообичаените комерцијални реклами прикажаа сцени и пораки поврзани со Раѓањето на Исус Христос.
Настанот се одржа кон крајот на ноември, во пресрет на божиќните празници, кога на кратко време дел од најпознатите дигитални екрани во светот беа затемнети, а потоа прикажаа визуелна приказна инспирирана од библиското сведоштво за Христовото Раѓање – Богомладенецот во Витлеем, Пресвета Богородица, праведниот Јосиф и пастирите.
Според информации што ги пренесоа и мејнстрим медиуми, станува збор за координирана визуелна кампања, чија цел била да се потсети јавноста на духовното значење на Божиќ, во простор кој е симбол на глобалната комерцијализација и медиумска врева.
Вирално видео и појаснување од медиумите
Настанот доби дополнително внимание откако видео од билбордите стана вирално на социјалните мрежи во деновите околу Божиќ. Дел од корисниците првично сметаа дека станува збор за настан што се случил на самиот празник, но подоцна меѓународни информативни портали појаснија дека видеото е од крајот на ноември и било повторно споделено во празничниот период.
Медиумите нагласија дека не станува збор за трајна промена или официјална верска програма, туку за краткотрајна јавна порака, реализирана со дозвола на сопствениците на дигиталните екрани.
Порака што привлече внимание
Иако настанот не беше организиран од државни институции, неговата појава во јавниот простор предизвика силни реакции – од изненадување и одобрување, до дискусии за местото на верата во современото општество.
Фактот дека порака за Христовото Раѓање беше прикажана токму на Тајмс Сквер – место познато по реклами, забава и масовна култура – многумина го протолкуваа како силен симболичен контраст и потсетник дека Божиќ, пред сè, е празник на воплотувањето на Синот Божји, а не само културен или трговски настан.
