„Чесниот Појас“ (Miracle Ribbon) е меѓународна мрежа која собира и објавува вистински сведоштва на луѓе кои ја искусиле помошта на Пресвета Богородица и на Светиите во моменти на искушение и неизвесност.
Преку нивните лични приказни, мрежата пренесува пораки на вера и надеж, потсетувајќи дека и во најтешките моменти молитвата може да стане извор на сила и утеха. Едно такво сведоштво е приказната на Тобијас и неговата сопруга, семејство од Америка, кои во 2016 година се соочиле со голем страв, кога бременоста на неговата сопруга била проследена со сериозна загриженост за здравјето на нивното неродено дете.
Испитувањата покажале голема веројатност нивната ќерка, Женевјев, да има трисомија 16, хромозомска аномалија која може да биде поврзана со спонтан абортус или со сериозни компликации и проблеми во развојот. Веста силно го вознемирила брачниот пар. Соочени со неизвесноста за иднината на нивното дете, тие уште повеќе се свртеле кон молитвата, барајќи од Пресвета Богородица да се застапи за нивното семејство.
Во истиот период, нивниот духовник бил во посета на Света Гора. Кога дознал за тешката состојба со која се соочувале, ги замолил монасите да се помолат за семејството и се вратил во Америка носејќи со себе лента благословена на Чесниот Појас на Пресвета Богородица.
Тобијас и неговата сопруга ја врзале лентата околу стомакот на трудницата и продолжиле постојано да ја носат, придружувајќи го тоа со молитва и доверба во Божјото застапништво и во посредништвото на Пресвета Богородица. За нив тоа не било само обичен симбол, туку потсетување дека не се сами во искушението низ кое минуваат.
Како што минувало времето, следните медицински испитувања носеле сè поголемо олеснување. Причините за загриженост се намалувале и, на крајот, Женевјев се родила целосно здрава, без проблемите од кои нејзините родители стравувале.
Ова искуство длабоко го променило семејството. Искушението не завршило само со раѓањето на здраво дете, туку станало повод тие уште повеќе да се продлабочат во верата, да ја засилат молитвата и со сето срце да поверуваат во Божјата заштита, како и поактивно да учествуваат во животот на Црквата.
Денес, Тобијас и неговото семејство ја споделуваат својата приказна за да им дадат храброст на луѓето кои минуваат низ сопствени искушенија. Нивното сведоштво потсетува дека, кога стравот изгледа како да зафаќа сè, верата може да стане светлина, додека молитвата и утешителното присуство на Пресвета Богородица можат да дадат сила и надеж.
Видеото со интервјуто за нивната приказна може да се погледне под наслов: „Чудото на Тобијас: Патување на исцелување и вера“.
https://miracleribbon.org/el/%cf%84%ce%bf-%ce%b8%ce%b1%cf%8d%ce%bc%ce%b1-%cf%84%ce%bf%cf%85-tobias-%ce%ad%ce%bd%ce%b1-%cf%84%ce%b1%ce%be%ce%af%ce%b4%ce%b9-%ce%af%ce%b1%cf%83%ce%b7%cf%82-%ce%ba%ce%b1%ce%b9-%cf%80%ce%af%cf%83/
За оние кои сакаат подобро да се запознаат со мрежата „Чесниот Појас“ (Miracle Ribbon) и да ја поддржат нејзината мисија, достапна е и нејзината официјална интернет-страница.
https://miracleribbon.org/el/
