Порака за мир испрати Неговото Блаженство, Папата и Патријарх на Александрија и на цела Африка, г.г. Теодор II, од храмот на Пресвета Богородица во Хелиополис, Каиро.
Патријархот беше свечено пречекан вечерта во петокот, 13 март 2026 година, од митрополитот Мемфиски и Патријаршиски егзарх во Каиро, г. Никодим, епископот Ипонски г. Стефан, архимандритот Михаил, претставници на грчката држава, грчката заедница во Каиро и бројни верници.
Неговото Блаженство чиноначалствуваше на богослужбата на Третата статија од Акатистот кон Пресвета Богородица, во атмосфера исполнета со духовна возвишеност и молитвена побожност.
Во дворот на храмот, египетските извидници од Каиро формираа свечена почесна стража во чест на Патријархот, додека звуците на извидничката музика ѝ дадоа празничен карактер на церемонијата.
Катедралниот патријаршиски храм на Богородица, неодамна целосно обновен, блескаше со својата величественост. Осветлен и исполнет со верници, храмот ги пречека сите кои со побожност дојдоа да учествуваат во оваа свештена служба и да ги слушнат стиховите од Акатистот – химната посветена на Пресвета Богородица, Мајката која го донесе во светот Синот и Словото Божјо.
Длабока духовна порака
Во своето обраќање, Патријархот Теодор II говореше за љубовта на верниците кон Богородица и духовната сила што ја даваат нејзините Химни.
Тој изрази радост за побожноста на верниот народ, нагласувајќи дека односот на христијаните кон Богородица наликува на благодарноста на децата кон својата мајка.
„Сакам од длабочината на срцето да ѝ изразам благодарност на Пресвета Богородица што и оваа година сум во мојот сакан Хелиополис. Напорот што го направивте вечерва за да дојдете во нејзиниот храм ќе биде богато награден од нејзината благодат“, рече Патријархот.
Тој посочи дека Акатистот на Богородица се обраќа пред сè кон едноставноста и чистотата на срцето, а не само кон знаењето.
Повик на молитва и солидарност
Патријархот ги повика верниците во тешките моменти од животот да прибегнуваат кон молитва и да ги читаат Химните кон Богородица.
Со длабока емпатија се осврна и на страдањата на многу луѓе во светот кои ги изгубиле своите домови и живеат без основни услови за живот.
„Размислувам за куќите што се уриваат и за луѓето кои остануваат без храна и без семејство“, рече тој, повикувајќи на молитва Богородица да ги слушне молбите за сите кои имаат потреба од нејзина помош.
Мисијата на Православието во Африка
Значаен дел од неговото слово беше посветен на мисионерската дејност на Православната црква во Африка. Патријархот најави и претстојна посета на Конго, каде продолжува делото на православните мисионери.
Тој се осврна и на делото на свештеномонахот Хризостом Папасарантопулос, кој пред седум децении заминал во Африка за да го проповеда Христовото Евангелие.
Во рамките на оваа мисија се планира изградба на големи образовни и хуманитарни проекти.
„Подготвуваме три големи училишта во кои ќе се школуваат шест илјади деца“, истакна Патријархот, најавувајќи и изградба на здравствени установи за сиромашните.
„Љубовта на луѓето треба да завладее“
Завршувајќи го своето обраќање, Патријархот Теодор II нагласи дека и покрај сите тешкотии во светот, Црквата продолжува да чекори напред со љубовта како свој водич.
„Црквата продолжува. Православието продолжува. Љубовта на луѓето треба да завладее“, подвлече тој.
Тој им се заблагодари на верниците за нивната молитвена присутност, нагласувајќи дека Пресвета Богородица останува извор на надеж за христијаните.
„Нека Богородица биде наш благослов и надеж на Блискиот Исток, светлина во богоблагословениот Египет“, порача Патријархот.
На богослужбата присуствуваа претставници на грчката и кипарската дипломатија, членови на грчката заедница во Каиро, претставници на образовните институции и бројни верници.
Извор: orthodoxianewsagenxy.gr
