Денес се навршуваат педесет години од епископската хиротонија на Патријархот Московски и на цела Русија, г.г. Кирил. На 14 март 1976 година, во Неделата на Православието, тогашниот архимандрит Кирил Гундјаев бил хиротонисан за епископ Виборгски за време на Божествената литургија во Лаврата на Света Троица и Свети Александар Невски во Ленинград.
По повод овој јубилеј, претседателот на Русија, Владимир Путин, упати честитка до поглаварот на Руската православна црква, истакнувајќи ја неговата долгогодишна и неуморна служба во полза на Црквата, татковината и народот.
„Срдечно Ви честитам за 50-годишнината од почетокот на Вашата архиерејска служба“, се вели во пораката на Путин, во која се нагласува дека посветената и постојана работа на патријархот Кирил ужива широко признание и длабока почит.
Рускиот претседател истакнува дека мудриот пастирски збор на патријархот Кирил со години придонесува за единството на општеството, повикувајќи ги луѓето на милосрдие, добрина и правда, а истовремено нудејќи духовна поддршка и насока.
Во пораката се споменуваат и неговите иницијативи за поддршка на војниците кои учествуваат во т.н. „специјална воена операција“, како и напорите за воспитување на младата генерација, зајакнување на моралните и патриотските вредности, промоција на семејните идеали и зачувување на историското и културното наследство на Русија.
На крајот од честитката, Путин му посака на патријархот Кирил здравје, сила и успех во понатамошното извршување на неговата висока служба.
Од своја страна, членовите на Светиот синод на Московската патријаршија во својата честитка ја нагласуваат долгата и посветена архиерејска служба на патријархот Кирил, неговата верност на ветувањата дадени при хиротонијата, како и неговата постојана грижа за единството на Црквата и зајакнувањето на верата меѓу народот.
Во пораката се истакнува неговата пастирска дејност, честите посети на епархиите, поддршката на свештенството и верниците, како и проповедта на Евангелието во општеството. Посебно се нагласува и неговиот придонес за развојот на црковниот живот и соработката меѓу Црквата и државата во зачувувањето на духовните и моралните вредности.
Членовите на Светиот синод на крај му посакуваат на патријархот Кирил добро здравје, зајакнување на духовните и телесните сили и постојана Божја помош во неговата патријаршиска служба.
Извор: orthodoxianewsagency.gr
