Последното „збогум“ на починатиот патријарх на Грузија, Илија II, кој 49 години беше поглавар на Православната црква на Грузија, во овие моменти му го упатуваат илјадници Грузијци во Катедралниот храм „Света Троица“ во Тбилиси. За последен пат ја примаат благословот од човекот кој, покрај духовен лидер, претставуваше и симбол на национално единство на народот.
Погребната служба ја предводи Вселенскиот патријарх Вартоломеј, кој пристигна малку по 11 часот (по локално време) во Тбилиси. Сослужуваат местобљустителот на тронот, митрополитот на Сенаки и Чхоротску, Шио, како и архиереи на Грузиската црква.
Присутни се и патријархот на Бугарија, Даниил, архиепископот на Тирана, Драч и цела Албанија, Јован, архиепископот на Прешов и на Чешка и Словачка, Растислав, како и митрополитот на Америка и Канада, Тихон. Исто така, на погребната служба присуствуваат делегации од патријаршиите во Александрија, Антиохија, Ерусалим, Москва, Србија и Романија, како и од автокефалните цркви на Кипар, Грција и Полска.
Илјадници Грузијци се собрани и надвор од катедралниот храм „Света Троица“, додека службата се пренесува преку големи екрани поставени на повеќе локации. Долж целата рута од катедралата до стариот катедрален храм „Света Сиони“, каде што ќе се изврши погребот, присуството на народот е масовно.
На погребната служба присуствува целокупниот државен, политички и воен врв на земјата, како и дипломати и претставници на други христијански деноминации и религии.
Претходно утринава, пред телото на починатиот патријарх, беше отслужена Божествена литургија од страна на местобљустителот, митрополитот Сио.
Татко на цела Грузија
Земјата од вечерта на 17 март 2026 година, денот кога почина 93-годишниот патријарх, е во национална жалост. Илјадници верници поминаа покрај неговото тело од средата попладне, за да се простат и да го примат неговиот последен благослов.
Патријархот Илија II (роден како Ираклиј Гудушаури-Шиолашвили) беше 141-от поглавар на Православната црква на Грузија со титула Католикос-патријарх на цела Грузија, архиепископ на Мцхета и Тбилиси и митрополит на Бичвинта и Сухуми-Абхазија.
Тој беше устоличен на 25 декември 1977 година, во период кога прогоните од комунистичкиот режим доведоа до драстично намалување на црковниот живот – постоеја само 15 митрополии и 30 активни храмови. Под негово водство, црквата доживеа значајна обнова. Денес, Грузиската црква има 47 митрополии, околу 2.000 активни парохии и речиси 3.000 свештеници.
По неговата смрт, Светиот синод на Грузиската црква испрати порака до народот, нагласувајќи ја неговата општа прифатеност, духовна сила и влијание. Според синодот, Илија II беше, е и ќе остане „татко на цела Грузија“, бидејќи неговата љубов и грижа се однесувале на сите, без разлика на вера или националност.
Исто така се истакнува дека бројните пораки со сочувство од целиот свет покажуваат дека неговата загуба не ја погодува само Грузија, туку целото христијанство и пошироко.
Извор: orthodoxianewsagency.gr
