Европската Унија разгледува можност во новиот пакет санкции да бидат вклучени високи претставници на Православната црква на Русија, меѓу кои и нејзиниот поглавар, патријархот Кирил Гундјаев.
Според информациите на „Politico“, повикувајќи се на седум функционери и дипломати од ЕУ запознаени со разговорите, санкциите би можеле да бидат проширени кон лица од РПЦ кои отворено ја поддржуваат руската инвазија врз Украина.
Патријархот Кирил во повеќе наврати ја оправдуваше војната, нарекувајќи ја ситуацијата во Донбас „метафизичка борба“, а истовремено тврдеше дека Русија низ својата историја никогаш не напаѓала други држави. Тој веќе се наоѓа на санкциските листи на Велика Британија, Канада и Чешка, додека Естонија и Литванија му забранија влез на своја територија.
Според извори од ЕУ, сега постои можност да се усвојат санкции кои претходно биле блокирани од владата на Виктор Орбан. Мерките би биле насочени против високи претставници на РПЦ, вклучително и Кирил, кого дел од европските претставници го сметаат за близок сојузник на рускиот претседател и поддржувач на воените дејствија во Украина.
Новиот пакет санкции, покрај црковните личности, би опфатил и танкери поврзани со т.н. „сенковна флота“ на Русија, руски банки, финансиски институции, компании од воено-индустрискиот сектор, како и фирми обвинети за продажба на украдено украинско жито.
Во Украина, против патријархот Кирил се водат постапки поврзани со сомневања за нарушување на територијалниот интегритет на земјата, оправдување на руската агресија и поддршка на водење агресивна војна.
Извор: uaorthodox.com
