Архиепископот на Македонската православна црква – Охридска архиепископија, г.г. Стефан, заедно со претставници на свештенството, присуствуваше на државниот прием што Амбасадата на Руската Федерација го организираше на 15 јуни во Скопје, по повод Денот на Русија.
Присуството на црковниот врв на овој настан претставува уште еден гест во насока на негување и зајакнување на односите со Русија, особено на духовен и културен план.
Според објавата на фејсбук-профилот на Руската амбасада, меѓу гостите биле и вицепремиерот Иван Стоилковиќ, пратениците Реџеп Исмаил-Хактан и Драган Недељковиќ, како и амбасадорите на Босна и Херцеговина, Турција и Кина – Драган Јаќимовиќ, Фатих Улусој и Џијанг Сјаојан.
На приемот присуствувале и почесниот конзул на Русија во Охрид, Велимир Стојковски, претставници на дипломатскиот кор, политичките партии, бизнис-заедницата, медиумите, културниот и научниот живот, руски сонародници и активисти на здруженијата за македонско-руско пријателство.
Пред присутните се обратил рускиот амбасадор во земјава, Дмитриј Зиков, кој зборувал за поврзаноста на рускиот народ со својата татковина, улогата на Русија во меѓународните односи и подготвеноста за конструктивна соработка со сите партнери, вклучително и со македонските.
Во рамките на настанот била претставена изложбата „Истакнати културни дејци и достигнувања на Русија“, подготвена од Амбасадата.
За време на приемот биле изведени и дела од руските композитори Сергеј Прокофјев и Дмитриј Шостакович, по повод 135-годишнината и 120-годишнината од нивното раѓање.
Извор: Фејсбук-профилот на Амбасадата на Руската Федерација во Северна Македонија
