Членови на хорот „Козма Пречистански“, заедно со студенти од музичкото средно образование и играорци, деновиве престојуваа на островот Имврос, каде учествуваа во повеќе богослужбени и културни настани по повод празникот Успение на Пресвета Богородица.
Како што соопштија од хорот, посетата била реализирана по покана на Митрополитот на Имврос и Тенедос, г. Кирил, а со благослов на Епископот Антаниски г. Партениј.
Македонските учесници зеле учество и на Молебниот канон заедно со Митрополитот Кирил, а за време на празничните богослужби пееле на певниците заедно со домашните псалти.
Особено значајно за нив било учеството на Божествената литургија за Успението на Пресвета Богородица, со која началствувале Вселенскиот патријарх Вартоломеј и Архиепископот Тирански и на цела Албанија, г. Јован.
Од хорот посочуваат дека на богослужбата имале можност да пеат стихови на повеќе јазици – македонски, албански, црковнословенски и грчки.
Покрај богослужбениот дел, македонската група настапила и во рамки на празничната културна програма на Имврос. Пејачите и музичарите извеле повеќе традиционални песни, додека играорците претставиле дел од македонското фолклорно наследство со традиционални ора.
Од „Козма Пречистански“ велат дека престојот на Имврос за нив претставувал силно искуство на православното единство и заедништво.
„Нема поголема сила од единството во Православието – тоа вистински го почувствувавме како живо искуство!“, наведуваат од хорот во својата објава.
Тие изразија благодарност до Епископот Партениј за благословот за нивното учество, како и до Митрополитот Кирил за поканата, посочувајќи дека им претставувало особена чест што за време на престојот имале можност да бидат во близина на Вселенскиот патријарх, како и на Александриската и Албанската црковна делегација.
„Господова е земјата и сѐ што ја исполнува – сите сме едно, деца Божји!“, порачуваат од хорот „Козма Пречистански“ по завршувањето на престојот на Имврос.
Извор: Фејсбук профил на Хор „Митрополит Козма Пречистански“
