ПОСВЕТА НА СВЕТИ ПАЈСИЈ ОД „ВИМА ОРТОДОКСИА“
Од Јоргос Теохарис
12 јули 1994 година, во 11:00 часот претпладне. Смирениот Старец Пајсиј го предава својот дух во рацете на живиот Бог. Таму каде што беше предназначен, таму за каде што мечтаеше цел еден живот…
Се навршуваат цели 32 години од упокојувањето на Свети Пајсиј Светогорец, а сепак неговото присуство останува живо во душите на милиони верници.
Неговиот лик исполнет со смирение, неговите едноставни и мудри поуки, зборовите што извираа од чиста молитва и подвиг, продолжуваат да трогнуваат, да насочуваат и да поддржуваат луѓе од секоја возраст и од секое време.
Тој беше старец кој не им зборуваше само на луѓето, туку на нивните срца.
Оние што се удостоиле да го сретнат пренесуваат сведоштва за жива вера, чудесни искуства и длабока духовна преобразба.
Оние што не го запознале лично, го запознале преку книгите, извадоците и молитвите што ги остави зад себе – наследство на светост и лек за душата.
Во едно време на збунетост и духовна суша, Свети Пајсиј останува светилник на надежта и патоказ за светот што жеднее за вистина, молитва и смисла.
Сведоштво за телевизиската посвета што ја направи авторот на MEGA Channel
Една духовна величина што го одбележа 20 век. Прозорлив, подвижнички, смирен. Триединството на неговите добродетели.
Во неговата скромна ќелија, среде шумата на Панагуда на Света Гора, прибегнувале илјадници луѓе од Грција и од странство.
Научници брзале да го видат за да го објаснат необјаснивото! Бидејќи Бог е невозможно да се објасни со логиката и математиката на научното знаење.
Длабочината на неговите поуки не можеле да ја протолкуваат ниту познати врвни универзитетски професори, кои си заминувале успокоени и восхитени од просветлениот старец.
Обични луѓе, студенти, но и научници, како што веќе споменавме, барале одговори за своите проблеми, таги и безизлезни состојби.
Сакале да го отплеткаат клопчето на своите мисли и да најдат решение. И го наоѓале кај старецот.
„Сите доаѓаа овде натажени“, изјави за „ВИМА ОРТОДОКСИА“ отец Арсениј, кој денес живее во ќелијата на Старецот Пајсиј и извесно време му служел.
„И сите си заминуваа радосни, мислам дека тоа кажува сè“, нагласува тој.
Кога го прашав за јамата што се наоѓа десно од ќелијата, ми кажа дека таа јама ја ископал самиот Старец Пајсиј, бидејќи сакал да биде погребан тука, но потоа многу работи се промениле… работи за кои не можеме да зборуваме.
„Го видов Старецот Пајсиј како лебди“
Професорот по догматика на Богословскиот факултет при Аристотеловиот универзитет во Солун, г. Димитриос Целенгидис, во 2009 година ми зборуваше во посветата што ја подготвив за телевизиската станица MEGA и навистина ме потресе.
Не емитувавме сè што тогаш кажа за Старецот Пајсиј, за тоа да не биде сфатено дека најголемиот телевизиски канал во земјата повикува на негово прогласување за светител.
Затоа денес, во спомен на Старецот Пајсиј, го откривам потресното сведоштво што ми го даде професорот г. Целенгидис.
Длабоко трогнат и со солзи во очите ми кажа дека, по неговото упокојување, додека се наоѓал на Света Гора и одел кон неговата ќелија, го видел Старецот Пајсиј како лебди.
Појаснувачко прашање: Мислите пред да се упокои?
„Не, ви велам по неговото упокојување.“
Се вчудовидел. И ми кажа дека тоа не било првпат.
Старецот Пајсиј многу години го имал г. Целенгидис за свое духовно чедо.
Исто така, друг бизнисмен кој зборуваше во посветата откри дека Старецот Пајсиј секој месец, кога одел да го види, му го раскажувал неговиот живот во детали.
Ракописот – писмото на Старецот Пајсиј до неговата мајка Евлампија, која особено ја сакал.
„Им зборуваше на срцата на луѓето, не како некој волшебник…“, ми објасни Митрополитот Месогејски, г. Николај, кој, како што ми кажа во посветата, живеел со него во неговата ќелија во Панагуда шест месеци.
„Затоа што ти им даваш дрога на децата“
Во меѓувреме, подеднакво значајно е и сведоштвото на еден монах кој одел во ќелијата на Старецот Пајсиј.
Еден ден имало повеќе од 100 луѓе кои чекале да го видат. Старецот го зел послужавникот и почнал да ги послужува.
Така дошол до еден млад човек, на возраст од околу 30–35 години, зел локум од послужавникот, го натопил во земја и му го понудил!
Младиот човек останал вчудовиден.
„Зошто го правиш тоа, старче?“, го прашал.
„Затоа што ти им даваш дрога на децата“, одговорил Старецот Пајсиј.
Конкретниот човек бил трговец со наркотични супстанции. На крајот го повел внатре. Така тој го променил својот живот и се приближил до Христос.
Самиот монах бил сведок на ова и го прашал старецот за конкретниот човек, а тој му рекол:
„Отец Јосиф, колку се натажив за оваа душа што уништува илјадници деца. Но, кога би знаел каква прекрасна душа има овој човек и сега, кога се покаја, доколку ја обработува, може да стане и светител…!“
Што нè учи животот на харизматичниот старец
Еден обичен човек кој тргнал од Коница, Арсениј по световно име…
Завршил само трето одделение од основното училиште! А сепак, длабочината на неговите поуки упатува на еден научник на Бога!
По занимање бил столар. Тоа го работел сè додека не бил повикан да служи во војската.
Кога некој ќе му нарачал да изработи ковчег, тој, сочувствувајќи со тагата на семејството, но и со сиромаштијата во тоа време, не барал пари.
Уште тогаш блаженоупокоениот ја имал милостината како благослов.
Во војската бил радиооператор.
Следниот чекор: монах и „радиооператор на Бога“.
Старецот, наведувајќи ја како пример оваа своја должност за време на воената служба, му одговорил на некого што ја оспорувал користа од монашкиот живот дека монасите се „радиооператори на Бога“, мислејќи на нивната топла молитва и грижа за останатото човештво.
Што нè учи животот на старецот?
Дека утрешниот Старец Пајсиј може да биде и некој од нас, доволно е со својот подвижнички живот да Го трогне Бога.
Гробот на Свети Пајсиј во Суроти
Старецот Пајсиј беше погребан во Светиот исихастирион на Свети Јован Богослов во Суроти, Солун.
Не сакаше почести и слава, ми кажа неговото духовно чедо, Старецот Христодулос Ангелоглу, кој значително ми помогна да ја направам телевизиската посвета на MEGA.
Оттогаш, секоја година, ноќта меѓу 11 и 12 јули, на годишнината од неговото упокојување, во Светиот исихастирион се служи бдение со учество на илјадници верници, како што беше и оваа година.
Канонизација на Старецот Пајсиј
На 13 јануари 2015 година, Светиот и Свештен синод на Вселенската патријаршија пристапи кон канонизација на Старецот Пајсиј.
Вселенска патријаршија
Соопштение
Под претседателство на Неговата Божествена Сесветост, Светиот и Свештен синод се состана на својата редовна седница денес, вторник, 13 јануари 2015 година, за разгледување на прашањата запишани во дневниот ред.
На неа, Светиот и Свештен синод:
а) едногласно, прифаќајќи го предлогот на Канонската комисија, го внесе во Светителникот на Православната црква монахот Пајсиј Светогорец; и
б) по предлог на Неговата Божествена Сесветост, Вселенскиот патријарх г. г. Вартоломеј, со канонски гласови едногласно го избра преподобниот архимандрит г. Иринеј Аврамидис, кој служи во Париз, за помошен епископ при Високопреосветениот митрополит Француски г. Емануил, со титулата на некогаш славната Епископија Ригијска.
Во Патријаршијата, 13 јануари 2015 година
Од Главниот секретаријат на Светиот и Свештен синод
Свети Пајсиј: Мноштво верници чекаат во ред за да се поклонат – Погледнете видео
Мноштво народ уште од вчера се слева кон манастирот „Свети Јован Богослов“ во Суроти, Солун, по повод денешниот празник на Свети Пајсиј Светогорец.
Манастирот во кој почива Свети Пајсиј претставува место што ги привлекува верниците, а неговиот гроб е место на поклонение за луѓе како од Грција, така и од земји во странство што ја исповедаат православната вера.
Извор: vimaorthodoxias.gr
