Подземната капела на Националната катедрала во Букурешт ќе биде украсена со ликови на бројни романски монашки светители, меѓу кои и пустиници кои својот подвижнички живот го минале во пештери и осамени места на молитва.
Како што соопшти патријаршискиот викарен епископ Пајсиј Синајски, целокупниот изглед на капелата е замислен така што кај верниците ќе создава впечаток на монашка ќелија – простор на тишина, молитва и подвиг.
Епископот објасни дека изборот на небесните покровители на капелата не е случаен. По одлука на Романскиот патријарх Даниел, таа ќе биде посветена на свети Јован Јаков Нов Хозевит и свети Даниил Исихаст.
„Неговото Блаженство Патријархот Даниел одлучи оваа капела да биде ставена под покровителство на свети Јован Јаков Нов Хозевит и свети Даниил Исихаст, бидејќи и двајцата светители воделе подвижнички живот во пештери, а целокупниот концепт на капелата треба да ја долови атмосферата на молитва, тишина и аскетски живот“, изјави епископот Пајсиј.
Според него, иконографската програма ќе биде инспирирана токму од пештерата како место на средба меѓу човекот и Бога преку молитвата и духовниот подвиг. Свети Јован Јаков се подвизувал во пештерата на света Ана во Хозевитската пустина, додека свети Даниил Исихаст живеел во пештери во близина на манастирите Путна и Воронец.
Богата галерија на романски монашки светители
Во подземната капела посебно место ќе има богатата романска монашка традиција.
„Ако внатрешноста на катедралата, украсена со мозаици, ја изразува свеченоста и величественоста на византиското богослужение, подземната капела ќе создава атмосфера на монашка ќелија и ќе потсетува на пештерите и ќелиите издлабени во карпи, во кои големите пустиници на Црквата го минувале својот подвижнички живот“, посочи епископот.
Во олтарниот простор, согласно православната иконографска традиција, ќе бидат претставени свети архиереи од целата Православна Црква, како и романски архиереи познати по својата исихастичка духовност.
Во наосот ќе бидат насликани бројни романски монашки светители, меѓу кои и неодамна канонизираните свети Нифон и Петрониј од скитот Продром, свети Нектариј Протопсалт, свети Дионисиј Колчуски, свети Софрониј Антимски, како и светите Пајсиј и Клеопа од Сихастрија.
Меѓу женските монашки светителки ќе бидат претставени света Платонида Аргешка, света Филотеја Пасареска, света Антонина Тисманска, света Назарија Варатецка, света Филотеја Ремецка и света Матрона Хурешка.
Посебно место ќе добијат и романските светители кои живееле како пустиници во пештери, меѓу кои свети Никодим Тисмански, свети Антониј Иезерски, светите Мисаил и Даниил од Турну, свети Јован Прислопски, света Теофана Басараб, света Теодора Сихленска, света Мавра Чахлауска и света Елисавета Пасареска.
Ќе бидат насликани околу 3.470 квадратни метри
Епископот Пајсиј соопшти и дека во април бил организиран тендер за изведба на ѕидното сликарство во капелата.
Фрескоживописот ќе опфаќа површина од околу 3.470 квадратни метри и ќе биде изведен во техниката „a secco“, односно сликање на сува подлога.
Според епископот, оваа техника била избрана затоа што овозможува работите да бидат завршени за пократок период и со пониски трошоци, а изведбата ќе им биде доверена на искусни црковни живописци.
На крајот, епископот Пајсиј изрази надеж дека работите ќе бидат успешно завршени и дека капелата наскоро ќе стане нов простор за молитва.
„Да ни даде Бог радост заедно да се молиме во ова ново и прекрасно место на богослужение, во слава Божја и за духовна полза на сите“, порача патријаршискиот викарен епископ.
Извор: https://basilica.ro/
