Со свечено празнично бдение и Света Литургија во Бигорскиот манастир беше одбележан празникот Усекновение на чесната глава на Свети Јован Крстител, патронот на Бигорската свештена обител.
Централен настан на овогодишната прослава беше монашењето на тројца нови монаси. Стефан, Владимир и Јован, по монашкиот чин ги добија имињата Теодосиј, Харитон и Никифор. Монашкиот чин го изврши митрополитот Дебарско-кичевски г. Георгиј, во присуство на игуменот на Бигорскиот манастир, Епископот Антаниски г. Партениј.
Тројцата новозамонашени се монашки рожби на игуменот на Бигорски, Епископот Антаниски г. Партениј, под чие духовно раководство тие го започнале и го продолжиле својот монашки пат во Бигорската обител.
На празничното бдение присуствуваа голем број верници и гости од земјава и странство. Меѓу присутните беа и верници од Бугарија, Србија, Грција и Албанија, кои пристигнаа во Бигорски за празникот на Свети Јован Крстител.
Особен дел од празничната богослужба беше учеството на хорот за источно-православно пеење „Свети Јован Кукузел“ од Тирана. Хорот во Бигорски настапи со благослов на Неговото Блаженство, Архиепископот на Тирана, Драч и на цела Албанија, а со своето учество придонесе кон богослужбеното одбележување на празникот. На бдението се пееја црковни песнопенија на македонски, црковнословенски и албански јазик.
Прославата на патронот на Бигорски продолжи и наредниот ден со Света архиерејска Златоустова Литургија, со која чиноначалствуваше Неговото Високопреосвештенство митрополитот Дебарско-кичевски г. Георгиј, во сослужение со игуменот на Бигорски, Неговото Преосвештенство епископот Антаниски г. Партениј, со браќата свештенослужители од Обителта, како и со бројни други свештенослужители.
Со молитва, духовна радост и свеченост, во присуство на мноштво верници, беше одбележан празникот на Свети Јован Крстител, а Бигорската обител уште еднаш се покажа како жив духовен центар и место на собирање на верниот народ.
Величествено беше прославен патронот на Бигорскиот манастир, во едно од најзначајните и најпочитувани духовни светилишта кај нас.
Извор: Бигорски манастир
