Православните верници во повеќе балкански земји го празнуваат Успението на Пресвета Богородица, еден од најголемите Богородични празници. Во храмовите и манастирите на православните цркви во Бугарија, Романија, Албанија и Грција беа отслужени празнични богослужби, а илјадници верници учествуваа на литургиите и традиционалните литијни поворки.
Заедничката порака што произлегува од беседите на поглаварите и архиереите е дека Успението не претставува разделба на Богородица од светот, туку нејзино продолжено духовно присуство и застапништво за верниците.
Бугарија: Патријарх Даниил – Богородица не го напушти светот
Во Бугарија празникот беше одбележан во голем број храмови и манастири, а Успението на Пресвета Богородица воедно е и официјален празник на Варна, Несебар и Ќустендил.
Бугарскиот патријарх и Софиски митрополит Даниил богослужеше во храмот „Успение на Пресвета Богородица“ во Ќустендил.
Во својата беседа тој нагласи дека Богородица и по своето Успение не го напуштила светот, туку продолжува да ги закрилува христијаните.
„Го воспеваме Успението на Пресвета Богородица и крајот на нејзиниот земен живот, затоа што таа не го напушти светот“, порача патријархот, потсетувајќи и на црковното предание според кое Богородица по погребението им се јавила на апостолите со зборовите: „Радувајте се, зашто јас сум со вас секогаш.“
Патријархот Даниил зборуваше и за престојот во Бугарија на Хавајската Иверска мироточива икона на Пресвета Богородица, која мироточи од 2007 година, оценувајќи дека нејзиното присуство претставува голем благослов и духовна поткрепа за верниците.
Тој особено ја нагласи важноста на покајанието и исповедта како пат кон обновување на заедницата меѓу човекот и Бога.
Во Тројанскиот манастир, пак, стотици верници учествуваа во празничната богослужба и традиционалната литија со чудотворната икона на Богородица „Троеручица“, која во манастирот се чува повеќе од четири века. На прославата присуствуваше и бугарската претседателка Илијана Јотова.
Романија: Богородица останува присутна преку своите молитви
Романскиот патријарх Даниел во својата празнична беседа порача дека Богородица, и по Успението и вознесувањето на небото, останува присутна во светот преку своите молитви.
Тој присуствуваше на Светата литургија во историскиот параклис „Свети великомаченик Георгиј“ во Патријаршиската резиденција.
„Иако Богородица минува низ смртта и потоа е земена на небото и со телото и со душата, таа засекогаш останува присутна во светот преку своите молитви“, истакна патријархот.
Осврнувајќи се на црковното предание, тој потсети дека три дена по погребението на Богородица пристигнал апостол Тома. Кога апостолите го отвориле гробот за тој да може да ѝ се поклони, го пронашле само погребниот покров, разбирајќи дека Богородица била земена на небото.
Патријархот Даниел нагласи дека Успението претставува премин „од земниот, минлив живот кон непропадливо постоење“.
Тој ја објасни и богословската порака на иконата на Успението, на која Христос ја држи душата на Својата Мајка, претставена како мало дете во бела облека.
Според романскиот патријарх, празникот истовремено претставува повик секој христијанин да размислува за сопствениот живот и да се подготвува за вечноста.
„Богородица е заштитничка на семејствата, децата, мајките, родителите и на сите верници“, порача патријархот Даниел, нагласувајќи дека таа особено ги закрилува сиромашните, вдовиците, сираците и осамените.
Албанија: Верници во древните храмови и манастири
Свечено беше и во Православната црква на Албанија, каде Успението на Пресвета Богородица беше прославено во повеќе историски храмови и манастири.
Митрополитот на Фиер, Николаос, ја отслужи Светата литургија во древниот храм „Успение на Пресвета Богородица“ во археолошкиот локалитет Аполонија, по што околу храмот беше извршена и празнична литија.
Митрополитот на Ѓирокастро, Натанаил, богослужеше во храмот посветен на Успението во Крионери, додека во пресрет на празникот служеше вечерни богослужби во Коцари и Дервичани.
Корчанскиот митрополит Анастасиј служеше во манастирот „Успение на Пресвета Богородица“ во Бобоштица, каде на крајот од богослужбата иконата на Успението беше носена во литија околу храмот.
Во Елбасан, митрополитот Антониј богослужеше во храмот „Свети Никола“.
Празникот беше прославен и во историскиот храм „Панагија Влахерна“ во Берат, каде се наоѓа познато изображение на Успението на Богородица, како и во манастирот „Свети Власиј“.
Пораката и во Албанија беше дека Богородица, и по своето Успение и преминување во небесната слава, не го напушта светот, туку продолжува со мајчинска грижа да се застапува пред својот Син за верниците.
Грција: Архиепископ Јероним – Да љубиме повеќе, а да судиме помалку
Во Православната црква на Грција, Атинскиот и на цела Грција архиепископ Јероним празникот го одбележа во свештениот исихастирион „Преображение на Спасителот – Свети Порфириј“ во Милеси, Атика.
Во својата порака до верниците тој повика примерот на Богородица да биде поттик за подлабок христијански живот.
„Да ја молиме Богородица да нè научи да внесуваме повеќе Христос во нашиот живот“, порача архиепископот Јероним.
Осврнувајќи се на пораката на Успението, тој нагласи дека Богородица преку болката и искушенијата ги учи верниците да имаат поголема доверба во Бога и стравот да го надминуваат со вера и надеж.
Неговата порака по повод празникот беше и повик да љубиме повеќе, а да судиме помалку.
Успението – еден празник, заедничка порака
Иако празнувањето во секоја од помесните православни цркви има свои традиции, литии и локални обичаи, пораките од Бугарија, Романија, Албанија и Грција се обединуваат околу истата суштина – Успението на Пресвета Богородица не се разбира како крај, туку како премин од земниот во вечниот живот.
Во православното предание Богородица останува Мајка и застапничка на христијаните, а нејзиното Успение е празник на надежта во воскресението, вечниот живот и победата над смртта.
Извори: BTA (Bulgarian News Agency), Orthodox Times, Basilica.ro
