Во Грција, празникот Воведение на Пресвета Богородица има посебно значење не само за Православната црква, туку и за државата и војската. На 21 ноември, кога според црковниот календар што го следи Православната црква на Грција се празнува Воведение, земјата истовремено го одбележува и Денот на вооружените сили, чија небесна заштитничка е Пресвета Богородица.
Оваа традиција претставува впечатлив пример од нашето непосредно соседство за поврзаноста на православната вера, државните институции и војската. Пресвета Богородица во грчката воена традиција се почитува како „Непобедлива Војвотка“ (Υπέρμαχος Στρατηγός), а нејзиниот празник е дел од официјалното државно чествување на вооружените сили.
По повод годинашното празнување, министерот за национална одбрана на Грција, Никос Дендијас, во своето официјално обраќање ја нагласи духовната поврзаност меѓу православната традиција и историјата на грчкиот народ.
„Пресвета Богородица низ вековите ги закрилува вооружените сили, а преку нив и нашата татковина“, истакна Дендијас.
Тој нагласи дека празнувањето на Воведение истовремено претставува сведоштво за историската поврзаност на Православието со грчката држава и народ.
„Пресвета Богородица нека ги закрилува нашите вооружени сили и целиот елинизам“, порача грчкиот министер на крајот од своето обраќање.
И началникот на Генералштабот на грчките вооружени сили, генерал Димитриос Хупис, во својата празнична порака посебно го истакна значењето на православната вера.
Според него, 21 ноември не е само ден на воено сеќавање, туку празник во кој се обединуваат верата, историјата, државата и Црквата, околу вредностите на самопожртвуваноста, одговорноста и љубовта кон татковината.
По повод празникот, во Атина беше отслужена свечена доксологија во Митрополитскиот храм, на која присуствуваа претседателот на Грција, Константинос Тасулас, министерот за национална одбрана и највисоките претставници на вооружените сили. Свеченостите продолжија со положување венец на Споменикот на незнајниот војник.
Одбележувањето на Воведение како Ден на вооружените сили покажува дека во соседна Грција православното духовно наследство има свое јасно и јавно место во државната и воената традиција.
Примерот од соседството сведочи дека почитувањето на Пресвета Богородица не останува ограничено само на црковните храмови, туку е присутно и во официјалните државни свечености, во воената традиција и во пораките на највисоките претставници на државата.
Извор: https://www.orthodoxianewsagency.gr/epikairotita/oi-enoples-dynameis-kai-ta-eisodia-tis-theotokou/