„Зошто да постам?“ – се прашуваат многумина. Но прашањето може и поинаку да се постави: зошто да не постам? Што ни нуди постот на Црквата во денешниот свет?
Во авторски текст, пензионираниот библиотекар и дипломиран правник и теолог Сотирис И. Стилијану истакнува дека првото и најважно значење на постот е послушноста кон Божјата заповед. За оние што тврдат дека постот е „наметнат од свештениците“, авторот потсетува дека воздржувањето од одреден вид храна било првата и единствена заповед што Бог им ја дал на прародителите. Исто така, и Христос постел четириесет дена пред да ја започне Својата јавна дејност.
Постот, според текстот, претставува духовна вежба што му помага на човекот да стане повоздржан – не само во исхраната, туку и во зборовите и во борбата против страстите. Тој има и здравствени придобивки. Многу научни истражувања ја поврзуваат медитеранската исхрана со долговечноста, а авторот смета дека во нашите краишта токму црковниот пост бил составен дел од тој начин на исхрана. Во време на изобилство со храна, која често е штетна за здравјето, постот станува поактуелен и попотребен.
Се нагласува дека постот не е средство за слабеење. Како што наведува авторот, ако некој сака да ја подобри својата фигура, треба да се обрати кај нутриционист; постот, пак, се држи како исполнување на црковната заповед.
Покрај духовната и здравствената димензија, постот има и социјална и еколошка вредност. Со воздржување се создава можност за заштеда, која може да се насочи кон помош на оние што имаат потреба, како што советуваат светите Отци. Воедно, ваквиот начин на живот придонесува и за поголема грижа кон природата.
Авторот се осврнува и на ставот дека „доволно е да имаме чисто срце“. Тој посочува дека ако не започнеме од малите и, наизглед, полесни нешта, тешко ќе успееме во поголемите и потешките духовни подвизи.
Според учењето на светите Отци, вистинскиот пост не се состои само во воздржување од храна, туку и во оддалечување од неправдата, осудувањето и лагата, како и во вниманието да не ги повредуваме другите. Оттука, постот има длабока духовна содржина и значење.
„Ако ги земеме предвид сите овие аспекти, повторно се поставува прашањето: зошто да не постиме?“ – заклучува авторот.
Извор: pemptousia.gr
