Вселенскиот патријарх Вартоломеј I е избран за надворешен член на Француска академија за морални и политички науки, а свечената церемонија на неговото примање ќе се одржи на 30 март 2026 година во Институтот на Франција во Париз.
Истовремено, предвидена е и официјална средба со францускиот претседател Емануел Макрон, како и со премиерот на Франција.
Патријархот Вартоломеј ќе ја заземе академската столица што претходно му припаѓала на папата Бенедикт XVI, и според традицијата, во својот говор ќе се осврне на животот и делото на својот претходник.
Оваа висока чест била официјално потврдена со указ потпишан од претседателот Макрон во април 2025 година, а самата церемонија ќе се одржи под куполите на Институтот на Франција, во присуство на водечки академици и претставници на француската држава.
Вселенскиот патријарх веќе пристигна во Париз придружуван од црковна делегација, а кон него таму ќе се приклучат и претставници на Француската митрополија.
Овој настан претставува значајно признание за улогата на Вселенската патријаршија во современиот свет, особено во сферата на дијалогот меѓу религијата, општеството и политиката.
Избор: orthodoxianewsagency.gr
