Во Православната црква на Грузија расте јавната дебата околу изборот на наследник на блаженоупокоениот патријарх Илија II, но од Патријаршијата повикуваат на смиреност и доверба во црковните институции.
Шефот на службата за односи со јавноста, протоереј Андреј Џагмаидзе, нагласи дека процесот на избор не треба да се води преку медиумски и телевизиски расправи, туку исклучиво според Уставот и канонскиот поредок на Црквата.
Тој истакна дека изборот ќе го изврши Светиот синод на Грузиската црква, кој во проширен состав ќе гласа за новиот Католикос-Патријарх, со мнозинство гласови од архиереите.
Според правилата:
-најпрво Синодот предлага тројца кандидати
-потоа следи гласање во проширена седница
-доколку нема мнозинство во првиот круг, се одржува втор круг меѓу двајца кандидати
-Кандидатите мора да бидат епископи на Грузиската црква, со богословско образование, управувачко искуство, возраст меѓу 40 и 70 години и да се монаси.
Посебно беше нагласено дека актуелниот местобљустител, митрополитот Шио, заедно со членовите на Синодот, ќе ја води постапката строго според црковниот Устав.
Процесот треба да започне најрано по 40 дена, а најдоцна во рок од два месеци по упокојувањето на патријархот, што значи дека претстојниот избор ќе биде еден од најзначајните настани за Црквата во последните децении.
Изборот на новиот поглавар се смета за историски момент, имајќи предвид дека последниот пат ваква постапка се одржала пред речиси половина век, а во меѓувреме е изменета и самата процедура.
Извор: orthodoxianewsagency.gr
