Топлите сочувства на патријархот Московски Кирил по повод смртта на верскиот лидер на Иран, ајатолахот Хаменеј, не нè изненадуваат. Тие едноставно нè потсетуваат со нагласеност на реалноста.
Идеалната Русија, која се темели на „традиционалните вредности“, е „православниот“ Иран. Во овој пример, шефот на државата не е само управител, туку ајатолах кој толкува сè, додека црквата дејствува како пренесувач.
„Некогаш, кога нашиот претседател Владимир Путин беше прашан од новинарите за ставот на Православието кон католицизмот и исламот, одговори дека сме поблиску до исламот, и јас така верувам“, имал признаено претходно поглаварот на Руската црква за време на една посета на Казан, главниот град на Татарстан. „И исламот и Православието“, објаснил патријархот, „припаѓаат на истата источна група. Впрочем, меѓу непосредните приоритети на дијалогот на Руската црква со исламот, Иран го зазема првото место.“
Постои значајна… предисторија. Како пример наведуваме:
Десеттата седница на Заедничката руско-иранска комисија за дијалог „Православно христијанство – ислам“, со тема: „Меѓурелигискиот дијалог и соработката како средства за стабилен и праведен мир“, се одржа на 26–27 септември 2016 година во Москва. Копретседатели на седницата беа митрополитот Казански и Татарски Теофан и д-р Абузар Ебраими Токраман, претседател на Организацијата за култура и исламски односи.
Во заедничкото соопштение, меѓу другото, читаме:
„Членовите на консултациите го осудија наметнувањето на секуларните правила и стандарди на однесување, кои е невозможно да ги прифатат следбениците на традиционалниот морал. Членовите на делегациите нагласија дека секој обид за градење мирна и праведна заедница без религија е осуден на неуспех. Денешните кризни појави на Запад се должат токму на кусогледото настојување на политичките фактори да ја секуларизираат општествената заедница. Таквата позиција не може да биде прифатена од следбениците на традиционалните религии и неизбежно води кон напнатост и судири.
Страните изразија задоволство за продолжувањето на дијалогот меѓу Руската црква и муслиманската заедница на Исламската Република Иран. Тие ги оценија како значајни достигнувањата на Комисијата во изминатите дваесет години, како и нејзиниот придонес во зацврстувањето на пријателството меѓу народите на Русија и Иран. Учесниците ја истакнаа врвната улога на Неговото Блаженство Патријархот Московски и на цела Русија г.г. Кирил и на Мохамед Али Тасхири во создавањето на Заедничката комисија пред дваесет години. Актуелноста на дијалогот се потврдува од широкиот спектар на теми што се разгледуваат и од непрекинатиот заемен интерес на страните.“
Со членовите на таа десетта седница на Заедничката руско-иранска комисија за дијалог „Православие – ислам“, на 26 септември 2016 година се сретна и московскиот патријарх Кирил, кој го пофали делото на Комисијата, нагласувајќи дека таа утврдила приближување на ставовите по многу прашања на современото време.
„Се радувам што иницијативата што ја презедовме заедно, драг брате Тасхири, донесе толку добри резултати. Формираната работна група за дијалог меѓу Руската православна црква и иранските муслимани покажа дека меѓурелигискиот дијалог е оној што помага народите подобро да се разберат меѓусебно и да се постигне согласност за многу важни проблеми на современиот свет. Го сметам за важно тоа што во рамките на нашата Комисија заеднички се соочивме и продолжуваме да се соочуваме со предизвиците на агресивниот надворешен свет, кои се насочени дури и против моралните принципи на нашите религии. Врз основа на учењата на нашите вери во текот на дваесет години разменувавме мисли за суштински проблеми на современиот свет.“
Кога московскиот патријарх Кирил го прими амбасадорот на Иран во Русија, Казем Џалали, во патријаршиската резиденција во Даниловскиот манастир (април 2022 година), поздравувајќи го гостинот, нагласи дека се развиле добри односи меѓу народите на Русија и Иран, кои особено активно се развиваат во последните децении. Патријархот Московски ги сподели своите спомени од посетата на Иран во 1995 година: „Тогаш имав можност да ја посетам Техеран и други места и да се запознаам со духовниот живот на вашиот народ. Тоа уште повеќе во мене разбуди чувство на симпатија кон вашиот народ, култура и историја.“
Соjузот на Руската црква и Иран против „расипаниот Запад“ ни открива дека „моралот“ и „традицијата“ можат да дејствуваат како обединувачки елементи за „света војна“. Православно-исламската шеријатска визија треба да се наметне. А московскиот Кирил, како вистински ајатолах, предводи!
Автор: Панагиотис Ант. Андриопулос
Извор: fosfanariou.gr
