На свеченоста по повод 1700 години од Првиот Вселенски собор во Никеја беше испишана нова страница во современата црковна историја. Претставници од сите христијански традиции – православни, католици, Копти и ориентални христијани – за првпат по многу векови, едногласно го исповедаа Символот на верата во неговата вистинска и изворна православна форма, каква што ја утврдил Соборот во Никеја и каква што Православната црква доследно ја чува низ вековите.
Меѓу најистакнатите присутни беа Папата Лав, Вселенскиот патријарх Вартоломеј и Александрискиот патријарх Теодор, како и повеќе претставници на Католичката црква и другите древни патријархати. На заедничката исповед тие го читаа Символот на верата без додадокот „и од Синот“ (Filioque), што е едно од најчувствителните прашања во историјата на црковните односи и причина за расколот меѓу Истокот и Западот во 1054 година.
Овој чин претставува значаен дипломатски успех на Православната црква, која со децении настојува преку дијалог, трпение и љубовливо сведочење да ги упати другите христијански традиции кон изворното учење на Никејско-Цариградскиот Символ на верата. Враќањето кон автентичниот текст – дека Светиот Дух „исходи од Отецот“ – не е само теолошка точност, туку и духовен повик кон единство основано на вистината.
Овој историски момент покажува дека православната дипломатија, водена не со притисок, туку со љубов, смирение и доследност кон Светото Предание, може да донесе плодови кои остават трага. Заедничкото исповедање на Символот на верата во неговата древна форма е силен знак дека вистината, кога е сведочена со љубов, има моќ да поврзува.
Настанот многумина го толкуваат како важен чекор напред во односите меѓу христијанските цркви – чекор што ја покажува зрелоста на Црквата и потенцијалот за поголема хармонија, кога центарот на заедништвото е заедничката вера од која започнала целата христијанска историја.
Извор: OrthodoxTimes.com
