Во историската катедрала Светицховели во Мцхета денеска беше извршено свеченото востоличување на новоизбраниот Католикос-Патријарх на сета Грузија, Шио III. Со тоа Грузиската православна црква официјално влезе во ново поглавје по речиси петдецениското патријаршиско служење на блаженоупокоениот Илија II.
Шио III беше избран претходниот ден, на 11 мај, на проширениот црковен собор на Грузиската православна црква, одржан во соборниот храм „Света Троица“ во Тбилиси. Тој беше избран за 142. Католикос-Патријарх на сета Грузија, добивајќи 22 гласа од вкупно 39 архијереи со право на глас.
На свеченоста во Светицховели присуствуваа претставници на црковниот и државниот врв на Грузија, меѓу кои грузискиот премиер Иракли Кобахидзе, претседателот Михаил Кавелашвили, претседателот на парламентот Шалва Папуашвили, градоначалникот на Тбилиси Каха Каладзе, како и основачот и почесен претседател на партијата „Грузиски сон“, Бидзина Иванишвили.
Во својата прва беседа како поглавар, патријархот Шио III повика на Црква на сострадание, служење и духовна одговорност. Тој нагласи дека силата на Црквата не е само во зборовите, туку во христоподобната љубов и во носењето на товарите еден на друг. Новиот грузиски првојерарх истакна дека вратите на Црквата треба да бидат широко отворени за сите, особено за оние што се оддалечиле од црковниот живот.
Патријархот особено се осврна на младите, семејството, образованието и духовните предизвици на современото време, предупредувајќи дека човечките срца стануваат сè поотуѓени и постудени, додека искушенијата честопати ги заменуваат верата, моралните вредности, семејството и ближните. Тој порача дека иднината на народот зависи од укрепувањето на христијанската вера, почитувањето на преданието и воспитувањето на младите во дух на одговорност кон Црквата и општеството.
Во беседата, Шио III со посебна почит се осврна на својот претходник, патријархот Илија II, кого го нарече голем духовен отец, нагласувајќи дека неговото наследство треба да се зачува и продолжи како пат на служење на Бога, татковината и човештвото. Тој побара молитви од верниот народ за себе и за иднината на Грузиската православна црква, изразувајќи надеж дека ќе може смирено да го носи тешкиот крст на патријаршиската служба.
Новиот патријарх, роден како Елизбар Муҷири на 1 февруари 1969 година во Тбилиси, во младоста студирал музика, а потоа стапил како послушник во манастирот Шио-Мгвиме. Во монаштво бил потстрижен во 1993 година, ракоположен за ѓакон во 1995, а за свештеник во 1996 година од патријархот Илија II. Во 2003 година бил избран за епископ на Сенаки и Чхороцку, во 2009 бил возведен во архиепископски чин, а од 2017 година бил назначен за местобљустител на патријаршискиот престол.
Востоличувањето на Шио III има големо значење не само за Грузиската православна црква, туку и за поширокиот православен свет, бидејќи доаѓа по долгото и исклучително влијателно служење на Илија II, кој ја водеше Црквата од советскиот период до современата грузиска државност. Во следниот период вниманието ќе биде насочено кон тоа како новиот патријарх ќе го продолжи неговото наследство и како ќе ја води Грузиската црква во сложениот црковен, општествен и геополитички контекст.
Извор: https://orthodoxtimes.com/the-enthronement-of-new-patriarch-shio-of-georgia-video-upd/
