На проширениот црковен собор што денеска се одржа во соборниот храм „Света Троица“ во Тбилиси, митрополитот на Сенаки и Чхороцку, Шио Муҷири, беше избран за нов Католикос-Патријарх на сета Грузија.
Новиот грузиски првојерарх беше избран со 22 гласа од архијереите со право на глас, со што стана 142. поглавар на Грузиската православна црква. Неговите противкандидати беа митрополитот Јов од Урбниси и Руиси, кој доби 9 гласа, и митрополитот Григориј од Поти и Хоби, кој доби 7 гласа. Во гласањето учествуваа 38 членови на Светиот синод, а еден глас беше поништен.
Изборот доаѓа по упокојувањето на блаженоупокоениот Католикос-Патријарх Илија II, кој почина на 17 март годинава, на 93-годишна возраст, по речиси половина век на чело на Грузиската православна црква. Неговата смрт беше доживеана како крај на една голема епоха во духовниот и јавниот живот на Грузија.
Митрополитот Шио, чие световно име е Елизбар Муҷири, е роден на 1 февруари 1969 година во Тбилиси. Во монаштво стапил во манастирот Шио-Мгвиме, а подоцна бил ракоположен за ѓакон и свештеник. Во 2003 година бил избран за епископ на новоформираната епархија Сенаки и Чхороцку, а во 2010 година бил возведен во митрополитски чин. Од 2017 година беше назначен за местобљустител на патријаршискиот трон, со што веќе неколку години имаше значајна улога во управувањето со црковниот живот на Грузија.
Со неговиот избор, Грузиската православна црква влегува во ново поглавје по долгото патријаршиско служење на Илија II, кој ја водеше Црквата низ советскиот период, обновата по независноста на Грузија и сложените современи општествени и црковни предизвици.
