По повод 13 години од киднапирањето на митрополитите Павле Јазиги и Јохана Ибрахим, поглаварите на двете антиохиски цркви — патријархот Јован X на Грчката православна патријаршија на Антиохија и патријархот Игнатиј Ефрем II на Сириската православна патријаршија — упатија заедничко обраќање, во кое повторно побараа да се открие вистината за нивната судбина. Во пораката тие нагласуваат дека овој нерешен случај останува „рана на лагата врз лицето на вистината“ и еден од најболниот симбол на страдањето на христијаните и на народите на Блискиот Исток.
Двајцата архиереи беа киднапирани на 22 април 2013 година, во близина на Алепо, додека се враќале од хуманитарна мисија. Во нападот бил убиен нивниот возач, а од тој ден до денес нема сигурна и официјално потврдена информација за нивната судбина. Уште во првите денови по исчезнувањето, Reuters објави дека црковни извори потврдиле оти тие сè уште се водат како исчезнати, иако во јавноста тогаш се појавувале и непотврдени вести за нивно наводно ослободување.
Во новото обраќање, двајцата патријарси потсетуваат дека митрополитите не биле киднапирани како политички актери, туку како духовни отци што се враќале од хуманитарна служба. Тие ги нарекуваат симболи на христијанското присуство на Истокот и додаваат дека нивниот случај не ја изразува само личната трагедија на две црковни личности, туку и пошироката драма на Левантот, разорен од војни, интереси и долготрајно меѓународно молчење.
Патријарсите во пораката нагласуваат и дека во текот на овие 13 години биле користени „сите дипломатски, безбедносни, политички, општествени и други канали“, но без резултат. Тие истовремено повикуваат на христијанско единство над секоја конфесионална поделба, истакнувајќи дека киднапирањето на двајцата митрополити покажува дека христијаните на Истокот делат една иста судбина.
Случајот на митрополитите Павле и Јохана со години останува едно од најнеразјаснетите и најболни прашања поврзани со сириската војна. Уште во 2014, 2015, 2019, 2021 и 2023 година Антиохиската патријаршија и Сириската православна патријаршија редовно објавуваа заеднички апели, во кои ја осудуваа меѓународната тишина и бараа откривање на вистината. Во 2026 година таа линија продолжува, но веќе со уште потежок историски товар: повеќе од една деценија без одговор, без правна разрешница и без утеха за нивните цркви и народ.
На 13-годишнината од киднапирањето, солидарност изрази и Светскиот совет на црквите, кој соопшти дека исчезнувањето на двајцата архиереи останува „болна рана во Телото Христово“ и симбол на многуте загуби што ги претрпе сирискиот народ во годините на војна.
Најновото обраќање на патријарсите на Антиохија не е само уште еден комеморативен текст, туку продолжение на долгата борба за вистина, правда и сеќавање. Тринаесет години по нивното исчезнување, митрополитите Павле Јазиги и Јохана Ибрахим и понатаму остануваат живо сведоштво за страдањето на христијаните во Сирија и за една отворена рана што Блискиот Исток сè уште не успеал да ја затвори.
