Неговата Божествена Блаженост, Патријархот Антиохиски и на сиот Исток г. г. Јован X, во вторникот, 28 април 2026 година, ја посети седишната резиденција на Вселенската Патријаршија во Константинопол, каде што беше срдечно и братски примен од Неговата Сесветост, Вселенскиот Патријарх г. г. Вартоломеј.
Посетата уследи по пастирското патување на Патријархот Јован во југоисточна Турција, во областите што се наоѓаат под јурисдикција на Антиохиската Патријаршија. Во духот на пасхалната радост, тој посакал лично да му ги пренесе своите велигденски честитки на Вселенскиот Патријарх, одговарајќи и на претходните покани упатени од страна на Патријархот Вартоломеј.
При пристигнувањето на Претстојателот на древната Антиохиска Црква пред портите на Вселенската Патријаршија, тој беше пречекан од свештенството на Патријаршискиот двор, додека камбаните свечено ѕвонеа. Потоа, откако се поклони во чесниот Патријаршиски храм, Патријархот Јован се упати кон патријаршката резиденција, каде што го очекуваше Вселенскиот Патријарх.
На средбата меѓу двајцата Претстојатели присуствуваа и Старецот митрополит Халкидонски г. Емануил, претседател на Синодалната комисија за меѓуправославни прашања, како и митрополитот Анкирски г. Григориј, главен секретар. Од страна на Антиохиската Патријаршија присуствуваа митрополитот Алепски г. Ефрем, епископот Тарски г. Павле и архимандритот Партениј Алати, личен секретар на Патријархот Антиохиски.
По средбата, Вселенскиот Патријарх приреди вечера во чест на Патријархот Јован и неговата придружба. Според објавените информации, Патријархот Антиохиски ќе остане во Константинопол до пладне во четврток.
Извор: https://orthodoxtimes.com/the-patriarch-of-antioch-visited-the-ecumenical-patriarchate/
