Антиохискиот патријарх Јован X се сретна со папата Лав XIV во Ватикан, каде што разговараа за положбата на христијаните на Блискиот Исток и за тешките услови со кои тие се соочуваат поради продолжените воени конфликти и нестабилноста во регионот.
Во фокусот на средбата, одржана на 14 септември, биле состојбите во Сирија и Либан, како и историските односи меѓу Антиохиската православна црква и Римокатоличката црква, чии корени се протегаат уште од апостолските времиња.
Говорејќи за Сирија, патријархот Јован нагласил дека христијаните со векови се нераскинлив дел од оваа земја и дека актуелната состојба бара заеднички напори за зацврстување на граѓанскиот мир и општото добро.
Тој повторно повикал да се отфрлат сите обиди за исклучување или ограничување на учеството на христијаните во сириското општество, нагласувајќи дека тие треба да бидат третирани како рамноправни граѓани со целосни права и без дискриминација.
Во однос на Либан, патријархот посочил дека е неопходно да се стави крај на кризата што ја погодува земјата повеќе од една деценија.
На средбата било отворено и прашањето за киднапираните митрополити од Алепо, Павле Јазиги и Јован Ибрахим, чија судбина останува непозната повеќе од една деценија. Двајцата соговорници разговарале за потребата конечно да се најде решение и да се расветли случајот.
Папата Лав XIV, од своја страна, ја истакнал улогата на Антиохиската црква на Блискиот Исток и нејзиното историско значење. Тој посочил и на нејзината улога во градењето мостови и дијалог меѓу Истокот и Западот, како и во односите со арапскиот и исламскиот свет.
Средба со кардиналот Пјетро Паролин
Претходно истиот ден, патријархот Јован се сретнал и со државниот секретар на Ватикан, кардиналот Пјетро Паролин.
Патријархот нагласил дека Антиохиската црква ги поддржува напорите за воспоставување мир и за запирање на последиците од војните кои доведуваат до масовно иселување и раселување на населението.
Во разговорите повторно биле разгледани состојбите во Сирија и Либан. Патријархот ја нагласил потребата од зајакнување на граѓанската еднаквост, соживотот и општествениот мир во Сирија, истакнувајќи дека христијаните се суштински дел од сириското општество.
За Либан, тој повикал на запирање на нападите, особено оние насочени кон јужниот дел на земјата, како и на поддршка на уставните институции во нивните напори за прекин на конфликтот, враќање на раселените и спречување внатрешни поделби преку дијалог.
Христијанското присуство на Блискиот Исток
Во рамките на посетата на Ватикан, патријархот Јован се сретнал и со кардиналот Клаудио Гуџероти, префект на Дикастеријата за Источните цркви.
На средбата била нагласена потребата од поголема соработка и солидарност меѓу црквите на Блискиот Исток во услови на бројни политички, општествени и безбедносни предизвици.
Патријархот имал средба и со кардиналот Марио Зенари, поранешен апостолски нунциј во Сирија, кој својата дипломатска служба во Дамаск ја извршувал 17 години.
Извор: Orthodoxia News Agency
