Девојче од седмо одделение било брутално претепано, влечено за коса, навредувано и понижувано од свои врснички, додека десетина малолетници го снимале насилството со мобилни телефони и навивале. На едно од видеата се гледа и како девојчето е принудено да клекне на колена и да се извини на една од девојчињата. Според информациите, инцидентот се случил завчера вечерта во скопската населба Аеродром.
- Читатели кои пријавиле, рекле дека уште синоќа, околу 23 часот, се обиделе да го пријават случајот во Полициската станица Лисиче, носејќи ги и видеоматеријалите. Според нивните тврдења, им било кажано дека тие не се сведоци на настанот и дека девојчето треба само да го пријави случајот. Полицијата официјално нема примено пријава, но Телевизија 24 дознава дека во полициските станици, заедно со своите родители, веќе се повикуваат малолетници за кои има индиции дека биле присутни на настанот. Преку разговори со нив се работи на утврдување на идентитетот на учесниците и на целосно расчистување на случајот.
„До сега нема пријава во СВР Скопје. Се преземаат мерки по допрен глас за утврдување на идентитетот на лицата и за целосно расчистување на случајот.“
Случајот повторно го отвори прашањето за врсничкото насилство во земјава. Според последните податоци на УНИЦЕФ, 23 проценти од младите на возраст од 13 до 15 години во Македонија изјавиле дека биле жртви на врсничко насилство барем еднаш во последните неколку месеци, а една третина од младите опфатени со анкета за безбедност на интернет изјавиле дека доживеале и онлајн малтретирање.
Извор: https://24.mk/
