Православната автокефална црква на Албанија успешно ги заврши своите годишни летни кампови за деца и млади, во кои учествуваа млади од различни делови на земјата, поминувајќи неколку седмици во духовно надградување, заедништво и рекреација.
Меѓу позначајните настани беше Вториот летен камп за девојки тинејџерки, кој се одржа од 20 до 27 јули во манастирот „Свети Јован Владимир“ во Шијон, Елбасан.
Во кампот учествуваа 56 девојки од повеќе албански градови. Во текот на седмицата тие учествуваа во молитви, богослужби, проучување на Светото писмо, катихетска настава, креативни работилници, игри, екскурзии и средби со архијереи, свештенослужители, богослови и гости-предавачи од Албанија и Грција.
Кампот го посети архиепископот Јован кој им се обрати на учесничките со духовна порака, а во дворот на манастирот засади чемпрес како траен спомен од собирот.
Од 23 до 30 јули беа организирани и други кампови: за момчиња во манастирот „Свети Јован Крстител“ во Воскопоја и за девојки во манастирот „Успение на Пресвета Богородица“ во Бобоштица, во близина на Корча.
Програмите опфатија Божествени литургии, катихетска настава, спортски и рекреативни активности, како и едукативни посети на историски цркви и манастири.
Учесниците ги посетија храмовите во Виткуќ, Дренова, Корча, Шипска и Воскопоја, како и Музејот во Корча.
Тие присуствуваа и на богослужбените празнувања во чест на света Ана, света Параскева и свети Пантелејмон. Празникот на свети Пантелејмон беше одбележан во Тушемишт, Поградец, каде што со богослужбата началствуваше митрополитот корчански Анастасиј.
Извор: orthodoxtimes.com
