Поглаварот на Македонската православна црква – Охридска архиепископија, архиепископот г.г. Стефан, упати честитка до митрополитот Онуфриј, поглавар на Украинската православна црква – Московска патријашрија, по повод 12-годишнината од неговото востоличување на Киевската митрополитска катедра.
Информацијата денеска ја објави Синодалниот информативно-просветен оддел на Украинската православна црква – МП, црковната структура во Украина која е историски и канонски поврзана со Московската патријаршија.
Во честитката архиепископот Стефан му се обраќа на Онуфриј како на „возљубен брат и сослужител пред Престолот Божји“.
„По премудрата Божја Промисла, Вие веќе дванаесет години духовно управувате со кормилото на Украинската православна црква. Во текот на ова време Вие се покажувате како камен-темелник, кој, и покрај сите искушенија, цврсто сведочи за евангелската правда и вистина“, се наведува во честитката.
Архиепископот Стефан, лично и во име на полнотата на Македонската православна црква – Охридска архиепископија, на митрополитот Онуфриј му посакал добро здравје, изобилни благослови од Господа и уште многу години да сведочи за вистината, љубовта и долготрпението.
Во пораката се додава дека тоа сведоштво треба да продолжи „како пред своите собраќа архиереи и од Бога доверениот народ, така и пред сите луѓе со добра волја“.
Извор: https://uoc-news.church/2026/08/17/nezvazhayuchi-na-vsi-viprobuvannya-vi-tverdo-svidchite-pro-jevangelsku-pravdu-ta-istinu-predstoyatel-makedonskoji-cerkvi-privitav-blazhennishogo-mitropolita-onufriya-z-richniceyu-intronizaciji/
