Македонската актерка Весна Петрушевска преку објава на социјалните мрежи повика на граѓанска поддршка за иницијатива насочена кон заштита на децата од штетните влијанија на дигиталниот простор.
Во својот апел, таа истакнува дека се потребни најмалку 10.000 потписи за да се испрати силна порака до сите политички партии, нагласувајќи дека станува збор за прашање од општествен интерес, а не за политичка агенда.
Линк за поддршка: https://www.change.org/p/изменете-закони-за-заштита-на-децата
„Барам само ваша поддршка и потпис. Ако ни ова не можеме, тогаш ќе се потврди дека сме херои само на тастатура“, наведува Петрушевска. Таа појаснува дека платформата Change.org нуди и опција за донации, но нејзината иницијатива не бара финансиски средства, туку исклучиво граѓанска поддршка.
Во објавата се посочуваат и примери од повеќе земји кои веќе вовеле или предложиле строги мерки за користење на социјалните мрежи кај малолетници.
Во Австралија, во ноември 2024 година беше донесен закон со кој целосно се забранува користење на социјални мрежи за лица под 16 години, без можност за родителска дозвола. Платформите како Meta, TikTok и X се соочуваат со високи казни доколку не ја спроведат регулативата.
Во Франција е воведен концептот на „дигитално полнолетство“, со старосна граница од 15 години, при што помладите корисници можат да пристапат само со изрична родителска согласност. Истовремено, во училиштата е ограничена употребата на мобилни телефони.
Данска иницираше дебата во рамки на Европската унија за зголемување на старосната граница за обработка на лични податоци, со посебен акцент на заштита од алгоритми кои ги таргетираат децата.
Во делови од САД, како Флорида и Јута, веќе се применуваат слични мерки – ограничување на користењето на социјални мрежи за помлади од 14 години, задолжителна родителска согласност за тинејџери, како и воведување на таканаречен „дигитален полициски час“.
Иницијативата што ја промовира Петрушевска има за цел да отвори поширока јавна дебата и во Македонија за потребата од системски решенија во заштитата на децата во дигиталната средина.
