„Останете во молитва” – порачаа актерите Марк Волберг и Џонатан Руми по повод почетокот на Великиот пост, споделувајќи кратко видео на социјалните мрежи.
Џонатан Руми, американски актер кој стекна светска препознатливост со улогата на Исус Христос во серијата „The Chosen“, во повеќе наврати сведочеше дека токму оваа улога длабоко ја преобразила неговата вера. Тој истакна дека времето поминато во толкување на ликот на Христос го приближило кон Него и придонело за духовно созревање.
И Марк Волберг, холивудска ѕвезда и двократно номиниран за „Оскар“, познат по улогите во филмовите „ Lone Survivor “ „The Fighter“ и „The Departed“, отворено говори за својата вера. На своите профили редовно споделува содржини со духовна тематика и ја нагласува важноста на постот, молитвата и духовната дисциплина.
Во едно свое телевизиско гостување, Волберг изјави дека токму верата му помогнала да изгради внатрешна дисциплина и јасна насока во животот. „Без разлика дали станува збор за пост, за оддалечување од суетата на светот или за времето поминато во молитва – сето тоа носи сила и мир. Бог не дојде да ги спаси праведните, туку грешниците. Сите се стремиме да станеме подобри личности, а мене верата во Христос ми помага во тоа“, рече актерот.
Двајцата актери и оваа година учествуваа во обредот на посипување со пепел на Пепелна среда (Западна Црква), со што симболично го означија почетокот на Великиот пост.
„Благословена Пепелна среда. Останете во молитва“, напишаа тие во заедничката објава, обраќајќи се до верниците со повик на духовна будност и подготовка во пресрет на Пасха.
Извор: stacja7.pl
