Со особено голем успех, длабока духовна атмосфера и меѓународен одек заврши Меѓународниот богословски симпозиум на тема „Спомен и чест на Старец Емилијан Симонопетрит: Сведок на славата Божја и духовен водител“, кој се одржа од 8 до 10 мај 2026 година во Атина и ја истакна огромната духовна оставнина на блаженоупокоениот старец во современото Православие.
Симпозиумот беше заеднички организиран од Света Велика обител Ватопед и Манастир Симонопетра, по иницијатива на ватопедскиот старец Ефрем, и собра во Атина истакнати богослови, архиереи, игумени, академици и бројни верници од Грција и од странство.
Работите започнаа во Christmas Theater во присуство на Архиепископ Јероним II, претставници на Црквата, државата и академската заедница, додека главниот дел од сесиите се одржа во хотелот Wyndham Grand Athens, претворајќи ја грчката престолнина во центар на православната богословска мисла.
Во текот на симпозиумот беа презентирани повеќе од триесет излагања, кои осветлија значајни аспекти од личноста и делото на Старец Емилијан Симонопетрит. Особен акцент бил ставен на неговото влијание врз современиот монашки живот, придонесот за развојот на општежителниот монашки поредок, како и неговата духовна отвореност кон Западот и другите православни цркви.
Учесниците посебно се осврнале и на неговиот однос со големите духовни личности на неговото време, како и на начинот на кој им пристапувал на младите и ја служел Светата Литургија.
„Старец Емилијан не беше само просветлен светогорски монах, туку светска духовна личност која длабоко влијаеше врз генерации монаси и мирјани ширум светот“, истакнале дел од учесниците на симпозиумот.
Особено емотивно било обраќањето на игуменот на Манастир Симонопетра, Старец Елисеј, кој на затворањето на симпозиумот го споредил делото на Старец Емилијан со „извор на жива вода“ што и денес духовно го напојува современиот човек.
„Сите на симпозиумот се собравме околу изворот на водата што ја нуди делото на Старец Емилијан“, рекол Старец Елисеј, предизвикувајќи силни емоции кај присутните.
Според информациите на грчките медиуми, интересот од странство бил исклучително голем, со учества и онлајн вклучувања од Европа, САД, Канада, Австралија и земјите од Блискиот Исток.
Богослови и црковни аналитичари нагласиле дека личноста на Старец Емилијан и понатаму претставува „мост“ меѓу автентичната светогорска традиција и современиот свет кој бара духовна насока.
Многумина од учесниците оцениле дека симпозиумот не бил само академски или црковен настан, туку голем духовен собир кој ја покажал живата присутност на Света Гора во современиот свет и единството на Православието.
Автор: Георгиј Теохарис
Извор: orthodoxianewsagency.gr
