Прашањето за повторното отворање на Богословската школа на Халки влегло во нова фаза, откако турскиот претседател Реџеп Таип Ердоган му наложил на Советот за високо образование на Турција да го продолжи дијалогот со Вселенската патријаршија.
Ова го открил митрополитот старец Халкидонски г. Емануил во изјава за грчкиот портал „Параполитика“.
Митрополитот Емануил, кој го придружувал вселенскиот патријарх Вартоломеј на средбата со турскиот претседател, потврдил дека процесот конечно се придвижил по повеќегодишен застој.
Според неговите зборови, Ердоган му наложил на претседателот на турскиот Совет за високо образование – YÖK да ги продолжи разговорите со надлежната комисија на Вселенската патријаршија.
Сепак, митрополитот Емануил не прецизирал кога Богословијата би можела повторно да биде отворена, нагласувајќи дека во моментов не постои конкретен временски распоред.
Како што објаснил, најнапред треба да бидат завршени обновувањето на училишниот комплекс и разговорите за образовната и правната рамка според која институцијата ќе работи.
Работата за обнова на Богословијата, која се спроведува со поддршка на Атанасиос Мартинос, сè уште трае. Митрополитот нагласил дека образовната дејност не може да започне пред целосното завршување и предавање на објектот.
Истовремено продолжуваат разговорите меѓу Вселенската патријаршија и турските образовни власти за условите под кои Богословијата повторно би работела. Патријаршиската страна веќе доставила конкретни предлози, но постапките и времетраењето на преговорите сè уште не се утврдени.
Според митрополитот Емануил, најважно е тоа што, по повеќе децении без суштински напредок, турскиот претседател им дал налог на надлежните институции да преземат конкретни чекори.
Тој оценил дека ваквиот развој претставува значајна промена во односот на турската влада кон едно од долгогодишните барања на Вселенската патријаршија.
Богословската школа на Халки е затворена од 1971 година, и покрај постојаните заложби на вселенскиот патријарх Вартоломеј и меѓународните повици за нејзино повторно отворање.
Митрополитот Емануил потсетил дека патријархот Вартоломеј многупати го поставувал ова прашање, оценувајќи дека новата наредба создава реална можност процесот конечно да продолжи.
Предлог за двегодишни постдипломски студии
Меѓу предлозите што се разгледуваат е Богословијата во почетокот да функционира како двегодишна постдипломска програма за дипломирани студенти од богословски факултети од целиот свет.
Митрополитот Емануил појаснил дека лично не учествува во надлежната комисија и не соопштил дополнителни детали за наставната програма и точниот начин на функционирање на установата.
Овие прашања треба да бидат утврдени преку консултации меѓу Вселенската патријаршија, Советот за високо образование и надлежните служби на турското Министерство за национално образование.
Опишувајќи ја новонастанатата состојба, митрополитот Емануил рекол дека „водата веќе влегла во коритото“, посочувајќи дека започнувањето на институционалната постапка е суштински чекор по 55 години чекање.
Улогата на Вашингтон
Во текстот на „Параполитика“ турското придвижување се поврзува и со интервенцијата на американскиот претседател Доналд Трамп, кој, според истиот извор, го поставил прашањето за повторното отворање на Богословијата за време на средбата со Ердоган во Белата куќа.
Се проценува дека и посетата на американскиот претседател на Анкара, по повод самитот на НАТО, влијаела врз времето во кое турската страна започнала да презема нови чекори.
Богословската школа на Халки со децении била еден од најважните образовни центри на Вселенската патријаршија и на Православието. Меѓу нејзините дипломци се патријарси, митрополити, свештеници и теолози од повеќе земји.
Нејзин дипломец е и вселенскиот патријарх Вартоломеј, кој го завршил своето образование во Богословијата пред нејзиното затворање.
Завршувањето на обновата и постигнувањето договор за правниот, административниот и образовниот статус остануваат двата клучни предуслови за нејзиното повторно отворање.
Извор: orthodoxia.info / parapolitika.gr
