Со благослов на бугарскиот патријарх Даниел и Светиот синод на Православната Црква на Бугарија, а во соработка со Бугарската национална телевизија (БНТ), грчката серија „Свети Паисиј: Од Фараса до Небото“ ќе се емитува за првпат во Бугарија. Серијата е посветена на чудесниот и побожен слуга Божји, свети Паисиј Светогорец.
Епизодите ќе се прикажуваат од понеделник до четврток во 22:00 часот на БНТ 1, а првата епизода ќе биде емитувана во среда, на 19 ноември. Делото, кое ја опишува животната приказна, делото и чудата на свети Паисиј, веќе освои стотици илјади гледачи во Грција, Романија, Србија и други земји, а сега за првпат ќе им биде достапно и на бугарската публика.
Свети Паисиј (со световно име Езепидис) е роден во 1924 година во Кападокија, Мала Азија, во православно христијанско семејство. Од најрана возраст покажувал длабока вера и се истакнувал по својата побожност. Подоцна се замонашил на Света Гора, каде станал познат по своите духовни дарови и помошта што им ја пружал на безброј луѓе. Свети Паисиј починал во 1994 година, а беше канонизиран во 2015 година. Неговото гробно место – манастирот „Св. Јован Богослов“ во Су̀роти, Грција – и денес е духовен центар што привлекува стотици верници кои секојдневно се обраќаат кон овој Божји угодник барајќи духовна помош и заштита.
Серијата „Свети Паисиј – Од Фараса до Небото“ претставува значаен културно-духовен настан за бугарската јавност, отворајќи ја вратата кон делото на еден од најпочитуваните светители на современото православие.
Извор: Православна Црква на Бугарија
