Православниот богословски факултет „Св. Климент Охридски“ – Скопје ја објави официјалната програма за Деветтиот Светиклиментов научен собир, кој оваа година се одржува под наслов „Теологијата и технологиите“. Настанот претставува годишна меѓународна и интердисциплинарна конференција, чија цел е современата македонска теолошка мисла да се поврзе со другите научни дисциплини на Универзитетот „Св. Кирил и Методиј“, како и со други научни установи и универзитети во земјава.
Годинашниот собир, кој ќе се одржи на 5 декември 2025 година (петок) со физичко присуство во Свечената сала на Факултетот, го насочува вниманието кон допирните точки меѓу теологијата и современите дигитални технологии. Особен фокус ќе има врз дилемите и предизвиците што ги отвораат дигитализацијата и вештачката интелигенција: од онтолошки и етички прашања, до нивната примена во научно-истражувачкиот процес, образованието, литургиската практика и пастирската мисија.
► Програмата започнува во 10:00 часот со официјално отворање, а продолжува со три тематски сесии, дискусии и завршно обраќање.
Прва сесија (10:30)
Работно претседателство: Виктор Недески, Борче Грамбозов
- Нинослав Марина – Теологија и технологија = благосостојба
- Илче Мицевски-Игнат – Технолошкото дехуманизирање на животот: последици и духовни решенија
- Дејан Борисов – Односот на Црквата кон технолошките иновации
- Анета Јовковска – Христијанска педагогија и дигиталниот интерфејс
- Дарко Анев – Логосот, алгоритмот и новозаветното слово
11:20 – Дискусија
Втора сесија (11:40)
Работно претседателство: Стефан Гоговски, Александар Крстаноски
- Иван Чорбев – Етички импликации на вештачката интелигенција – стварност или антропоморфизам
- Дејан Донев – Трансхуманизам и биоконзервативизам – каде е вистинскиот избор?
- Виктор Недески – Христијанска антропологија и вештачка интелигенција
- Борче Грамбозов – Одговорноста на теологијата во однос на технологијата и човекот како логосно битие
12:20 – Дискусија
12:40 – Пауза
Трета сесија (13:00)
Работно претседателство: Анета Јовковска, Дарко Анев
- Стјепан Штивиќ – Границите на техничките науки: смееме ли да направиме сѐ што можеме?
- Кирче Трајанов – Комуникација или симулација – клучниот предизвик во дигиталната ера
- Александар Крстаноски – Типографијата и црковнословенските богослужбени книги во Македонија
- Николче Ѓурѓиноски – Евхаристискиот живот на Црквата во време на дигитални технологии
- Милан Ѓорѓевиќ – Аскетика или технофилетизам? Екзистенцијалните избори на 21 век
13:50 – Дискусија
14:10 – Затворање на собирот
Светиклиментовиот научен собир останува значајна платформа за дијалог меѓу теологијата и современите општествени и технолошки процеси, поставувајќи ги темелите за понатамошно истражување на местото на човекот – како духовно и логосно битие – во брзо променливиот дигитален свет.
