Во петок, 19 декември, напладне, Архиепископот на Австралија, г. Макариј, ја посети областа Бонди во Сиднеј и им оддаде почит на жртвите од неодамнешниот смртоносен терористички напад, кој се случи за време на настан поврзан со еврејскиот празник Ханука.
Во придружба на Епископот Христофор од Керасунта, Канцелар на Светата Архиепископија, Архиепископот Макариј положи цвеќе на спомен-обележјето што спонтано беше создадено на местото на трагедијата, како израз на почит од граѓаните на Австралија кон жртвите. На настанот присуствуваа и министерката за индустриски односи и безбедност и здравје при работа на Нов Јужен Велс, Софи Коцис (MP), министерката за финансии, домашно производство и државни набавки, како и за природни ресурси, Кортни Хаусос, како и пратеничката во Парламентот на Нов Јужен Велс, г-ѓа Елени Петинос.
За време на посетата на Павилјонот Бонди, Архиепископот Макариј лично ја изрази својата солидарност со членовите на Еврејската заедница во Австралија, кои, пак, ја изразија својата благодарност за непосредната и недвосмислена осуда на терористичкиот напад од страна на Светата Архиепископија на Австралија.
Архиепископот Макариј исто така се сретна со Генералната гувернерка на Австралија, г-ѓа Сем Мостин (AC), на која ѝ ги пренесе своите искрени сочувства — во свое име, во името на Светиот Епархијски Синод и на целокупнота полнота на Православната Црква во Австралија. Генералната гувернерка срдечно му се заблагодари на Архиепископот Макариј за неговата иницијатива да го посети местото на трагедијата и ја истакна неговата улога како верски водач кој со дела ја покажува својата посветеност на мирното соживување и ја промовира солидарноста и соработката меѓу верските заедници.
Извор: orthodoxtimes.com
