Романскиот конзул во Хаифа, Адријан Бринковеану, ги оцени како неточни информациите што во последните часови се шират на интернет, според кои наводно ќе биде забрането одржувањето на богослужбите и церемонијата на Светиот Оган во Пресветиот Гроб, поради војната на Блискиот Исток.
Во објава на неговиот профил на Instagram, дипломатот истакна дека станува збор за непроверени и лажни информации кои предизвикале вознемиреност кај верниците.
„Пораките за наводното затворање на Гробот Христов и забраната на велигденските богослужби се лажни. Ве повикувам да не постапувате врз основа на вакви непроверени информации и да се информирате исклучиво од официјални и доверливи извори“, нагласи Бринковеану.
Тој додаде дека „верата не се темели на гласини, туку на вистина, расудување и мир“.
Во врска со истите информации, архимандритот Јован Меју, претставник на Романската Патријаршија во Светата Земја, за Basilica.ro изјави дека нема никаква официјална одлука ниту од државата Израел, ниту од Ерусалимската Патријаршија во однос на богослужбите за време на Велигден.
Црквата на Христовото Воскресение (Панагиот Гроб) во моментов останува затворена за поклоници исклучиво од безбедносни причини, по препорака на полицијата, поради зголемените стравувања од можни напади врз верски објекти.
Сепак, до денес нема официјално соопштение во врска со одржувањето на богослужбите за време на Страсната седмица, ниту за церемонијата на Пресветиот Оган на Велика Сабота.
Извор: basilica.ro
