На 98-годишна возраст се упокои „Патријархот на Киев“ Филарет (Михаило Антонович Денисенко). Веста за неговата смрт ја објави митрополитот Епифаниј, изразувајќи длабока жалост за неговото заминување.
„Денес има длабока тага во моето срце, како и во срцата на многу Украинци, бидејќи заврши земниот пат на патријархот Филарет“, напиша митрополитот Епифаниј, додавајќи дека неговите поуки за единството на Украинската Црква ќе останат трајно запаметени.
Филарет беше контроверзна, но влијателна фигура во црковниот живот во Украина. Тој беше основач на т.н. Киевската патријаршија по неговото разрешување од страна на Руската православна црква во 1992 година, а подоцна и анатемисан во 1997 година – одлука која беше признаена од целото Православие, вклучително и од Вселенската патријаршија.
Во 2018 година, Вселенската патријаршија го врати во канонско општење како поранешен митрополит Киевски, но не го призна неговиот патријаршиски статус. Истата година беше создадена Православната Црква на Украина, преку обединување на повеќе црковни структури.
Сепак, во 2019 година Филарет повторно се одвои од новоформираната црква и ја обнови Киевската патријаршија со мал број следбеници.
Роден на 28 јануари 1929 година во Донецката област, Филарет својата духовна служба ја започнал во Православната црква на Русија, каде што напредувал до митрополит Киевски и на цела Украина, пред да стане централна фигура во црковните поделби што ја одбележаа поновата историја на украинското православие.
Неговата смрт означува крај на една сложена и значајна ера за Црквата во Украина.
Извор: orthodoxianewsagency.gr
